14 ماۋسىمدا اتىراۋ وبلىسىندا "نۇر وتان" پارتياسى فيليالىنىڭ ساياسي كەڭەس بيۋروسىنىڭ كەڭەيتىلگەن ءماجىلىسى ءوتتى، كۇن تارتىبىندە بارلىق مەكتەپتەرگە ۇشتىلدىلىك جۇيەسىن ەنگىزۋ، ءبىلىم بەرۋ مەكەمەلەرىن سيفرلىق تەحنولوگياعا كوشىرۋ تاقىرىپتارى قويىلدى. ءقازىر ايماقتا coworking-ورتالىقتار مەن اعىلشىن ءتىلىن وقىتاتىن ۇيىرمەلەر قارقىندى تۇردە اشىلىپ جاتىر.

ەلباسى نازاربايەۆتىڭ "بولاشاققا باعدار: رۋحاني جاڭعىرۋ" ماقالاسىندا "جەر جۇزىندەگى ميللياردتان استام ادام ءوزىنىڭ تۋعان تىلىمەن قاتار، كاسىبي بايلانىس قۇرالى رەتىندە جاپاتارماعاي وقىپ جاتقان اعىلشىن ءتىلىن ءبىزدىڭ دە جاپپاي جانە جەدەل ۇيرەنۋىمىز كەرەكتىگى ەش دالەلدەۋدى قاجەت ەتپەي­تىندەي" دەپ ايتىلعان بولاتىن.
ماجىلىسكە ءتوراعالىق ەتكەن اتىراۋ وبلىسىنىڭ اكىمى نۇرلان نوعايەۆ ساياسي كەڭەس مۇشەلەرىنە وقۋشىلارعا اعىلشىن ءتىلىن وقىتۋ بويىنشا مەملەكەتتىك باعدارلامانى تابىستى جۇزەگە اسىرۋ ءۇشىن جوسپار جاساقتاۋدى ۇسىندى.

-بۇگىندە اعىلشىن ءتىلى حالىقارالىق بايلانىس تىلىنە اينالدى، ەكونوميكاسى دامىعان ەلدەردىڭ تۇرعىندارى مەن كوشباسشىلارى سول تىلدە سويلەيدى. قازاقستان الەمدىك تاجىريبەدەن قالىس قالماي، زامانعا ساي دامۋى كەرەك، اعىلشىن ءتىلىن ۇيرەنۋ بالالىق شاقتان باستالعانى دۇرىس. وسى ماقساتتا ايماقتاعى مەكتەپتەرگە ءۇشتىلدى وقىتۋ جۇيەسىن ەنگىزىپ جاتىرمىز. قازاقستاننىڭ وسكەلەڭ ۇرپاعىنا ساپالى ءبىلىم بەرۋ ءۇشىن اعىلشىن ءتىلىن پەداگوگتار دا وقۋلارى كەرەك. مەملەكەت باسشىسى ايتقانداي، بالالاردى اعىلشىن تىلىنە ءقازىر وقىتپاساق، بولاشاقتا تولىققاندى كادر دايىنداۋدى جۇزەگە اسىرا المايمىز. بۇل ماسەلە بارلىق جاۋاپتى ادامداردىڭ باقىلاۋىندا بولۋى ءتيىس، - دەدى نۇرلان نوعايەۆ.

ايتا كەتەيىك، "نۇر وتان" پارتياسىنىڭ باستاماسىمەن ايماقتا coworking-ورتالىقتار اشىلىپ جاتىر، وندا بالالار اعىلشىن ءتىلى مەن جاڭا سيفرلىق تەحنولوگيالار بويىنشا ءبىلىم الادى. ءىت – ورتالىق ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ بازاسىندا اشىلدى، وندا جالپى ءبىلىم بەرەتىن مەكتەپتەردىڭ ماماندارى وقىتىلادى.

ايماق باسشىسى "نۇر وتان" پارتياسى ساياسي كەڭەس بيۋروسىنىڭ مۇشەلەرىمەن بىرگە جاڭا ورتالىققا بارىپ، جۇمىسىمەن تانىستى جانە ناقتى تاپسىرمالار بەردى.

ءىت سالاسىندا مامان دايىنداۋ ءىسىن «ءبىلىم - يننوۆاسيا» ليسەيى دە كەڭ كولەمدە جۇرگىزىپ جاتىر، ونىڭ تۇلەكتەرى الەمدەگى الدىڭعى قاتارلى وقۋ ورىندارىنا تۇسۋدە.
ساياسي كەڭەس مۇشەلەرى كاسپيي ءوڭىرىنىڭ قازىرگى زامانعى كوللەدجىنە دە بارىپ، ءىت-سىنىپتاردى قارادى. بۇل كوللەدجدە نەگىزگى پارتيالىق جوبالار جوعارى دەڭگەيدە ۇيىمداستىرىلعان، اعىلشىن ءتىلىن ۇيرەنۋشىلەرگە ارنالعان پىكىرتالاس كلۋبى اشىلدى، وقۋ قۇرالدارى مەن ەلەكتروندى كىتاپحانا قولجەتىمدى، اعىلشىن ءتىلىن وقىتۋ سىنىبى بار.

-الداعى ءۇش جىلدا "نۇر وتان" مەملەكەتتىك جانە جەرگىلىكتى اتقارۋشى ورگاندارمەن، ۇەۇ وكىلدەرىمەن، بيزنەس
قۇرىلىممەن بىرلەسىپ ەلىمىز بويىنشا پروگراممالاۋ مەن روبوتتەحنيكا نەگىزدەرىن وقىتاتىن 1000 تەگىن ءىت سىنىپ اشۋدى جوسپارلاپ وتىر. بۇل جىلىنا 8 بەن 16 جاس ارالىعىنداعى 150 مىڭ بالانىڭ ءبىلىم الۋىنا مۇمكىندىك بەرەدى. اتىراۋ وبلىسىندا وسىنداي سىنىپتار اشىلعان 10 مەكتەپ بار، -دەيدى "نۇر وتان" پارتياسى اتىراۋ وبلىستىق فيليالى ءتوراعاسىنىڭ ءبىرىنشى ورىنباسارى نۇرلىبەك وجايەۆ.

بۇل وقۋشىلارعا قاراپايىم الگوريتم قۇرۋ، باعدارلامالار مەن WEB-سايتتاردى ەۋروپالىق ءبىلىم بەرۋ ستاندارتتارىنا ساي جاساۋعا مۇمكىندىك بەرەدى. بولاشاقتا تەحنوپاركتەر اشۋ دا جوسپاردا بار، سول ارقىلى الدىڭعى قاتارلى سيفرلىق داعدىلار مەن بىلىمگە قولجەتىمدىلىك ماسەلەسى شەشىم تابادى.