اتىراۋ قالاسىندا زاماناۋي قۇرىلىس نىسانى سالىنىپ جاتىر، دەپ جازادى Qamshy.kz اقپارات اگەنتتىگى. سالىنعان عيماراتتىڭ ەكىنشى قاباتىندا  قازاق، ورىس فرانسۋز، اعىلشىن جانە تۇرىك تىلدەرىن تەرەڭدەتىپ ۇيرەتەتىن سىنىپتار ورنالاسادى. ەلباسى نازاربايەۆ ءوزىنىڭ "بولاشاققا باعدار: رۋحاني جاڭعىرۋ" ماقالاسىندا لاتىن الىپبيىنە ءوتۋ مىندەتتەمەسىن قويا وتىرىپ، "ءبىرىنشى، وتاندىق مادەنيەت بۇۇ-نىڭ التى ءتىلى – اعىلشىن، ورىس، جۇڭگو، يسپان، اراب جانە فرانسۋز تىلدەرىندە سويلەۋى ءۇشىن ماقساتتى ۇستانىم بولۋى شارت." دەگەن بولاتىن. 

سوڭعى تەحنولوگيامەن جابدىقتالاتىن عيمارات 4 قاباتتان تۇرادى. وندا كۇرەس زالى، سپورتتىق گيمناستيكا مەن جەڭىل اتلەتيكا سەكسيالارى جۇمىس ىستەپ، باسكەتبول الاڭى مەن ءجۇزۋ باسسەينى دە اشىلادى. سونداي-اق جاستارعا ارنعالعان 300 ورىندىق ءماجىلىس زالى ءتۇرلى مادەني شارالاردى وتكىزۋگە قولايلى.

قۇرىلىس الاڭىنىڭ باسشىسى عابدول سارسەمبييەۆ: "ءبىر سوزبەن ايتقاندا، ۇلكەن كەشەن. جان-جاقتى، بالالاردىڭ بوس ۋاقىتىندا دەمالىپ، وزدەرىنىڭ دەنەلەرىن شىنىقتىرۋعا، العا قاراي وزدەرىن دامىتۋعا كوپ ۇلەسىن قوسادى دەپ ويلايمىن. قۇرىلىس قارقىندى جۇرۋدە، 150 ادام جۇمىس ىستەيدى. قازىرگى كەزدە قۇرىلىس ءوزىنىڭ ۋاقىتىمەن جۇرگىزىلىپ كەلە جاتىر."، دەپ اتاپ ءوتتى قۇرىلىس جۇمىسى تۋرالى.