استانانىڭ 20 جىلدىق مەرەيتويى قۇرمەتىنە اتىراۋ وبلىسى ەلوردانىڭ وڭ جانە سول جاعالاۋلارىن جالعايتىن كوپىر تارتۋ ەتتى، دەپ جازادى Qamshy.kz اقپارات اگەنتتىگى.

اتىراۋ وبلىسىنىڭ اكىمى نۇرلان نوعايەۆ نۇرسۇلتان نازاربايەۆقا كوپىردىڭ ساياباق ايماعىنداعى جاياۋ جۇرگىنشىلەر لەگى مەن ۆەلوسيپەد جەلىسىن ەسىل وزەنىنىڭ وڭ جاعالاۋىمەن جالعايتىنىن باياندادى.

قازاقستان پرەزيدەنتى جاڭا كوپىر اتىراۋ وبلىسىنىڭ لايىقتى تارتۋى ەكەنىن جانە ونىڭ ەلوردا تۇرعىندارى مەن قوناقتارىنا ۇزاق جىلدار بويى قىزمەت ەتەتىنىن اتاپ ءوتتى.

"استانالىقتار بۇل نىسانداردى دايىنداۋعا اتسالىسقان بارلىق وڭىرلەرىمىزگە العىس ايتۋعا ءتيىس. باس قالانى بۇكىل ەل بولىپ تۇرعىزدىق جانە بۇكىل ەل قۋانىشقا كەنەلۋى كەرەك"، – دەدى مەملەكەت باسشىسى.

سونىمەن قاتار، استانا قالاسىنىڭ اكىمى اسەت يسەكەشيەۆ نۇرسۇلتان نازاربايەۆقا جالپى ۇزىندىعى 56 شاقىرىم بولاتىن ۆەلوسيپەد كولىگىنىڭ ينفراقۇرىلىم نىساندارىن تانىستىردى. ۆەلوسيپەد جولى ەسىل وزەنىنىڭ بويى مەن سول جاعالاۋى جانە ەكسپو كەشەنىنىڭ نىساندارى ارقىلى وتەدى. ول قالالىق ساياباقتاعى شاڭعى جانە روليككە ارنالعان جولدار مەن يلينكا كەنتىنەن "جاسىل بەلدەۋ" ارقىلى وتەتىن ۆەلوسيپەد جولاقتارىن بايلانىستىرادى. ۆەلوترەكتەر ارنايى ۇستەلدەرى جانە ۆەلوسيپەد قوياتىن ورىندارى بار، wi-fi جانە تەلەفوندى قۋاتتاندىرۋ مۇمكىندىگى قاراستىرىلعان "اقىلدى ينفراقۇرىلىممەن" جابدىقتالعان.

شارا سوڭىندا اشىق اسپان استىنداعى امفيتەاتر ساحناسىندا اتىراۋ وبلىسى فيلارمونياسىنىڭ ونەر ۇجىمى ۇيىمداستىرعان "ۇلى دالا جۇرەگى – استاناما" اتتى تەاترلاندىرىلعان كونسەرتتىك باعدارلاما كورسەتىلدى.

ايتا كەتەيىك، كوپىردىڭ ديزاينى ساۋلەت ونەرىنىڭ الەمدىك ۇردىسىنە سايكەس كەلەدى. ونىڭ سىرت كەلبەتى زاماناۋي ۇلگىگە ساي، ال جاياۋ جۇرگىنشىلەرگە ارنالعان ىشكى جاعى جارىق پەن كولەڭكەنىڭ قىزىقتى كورىنىسىن بەينەلەيدى.

نىساننىڭ جالپى ۇزىندىعى – 313،5 مەتر، ەنى – 10،5 مەتر. كوپىردە جاياۋ جۇرگىنشىلەرگە ارنالعان التى مەترلىك جولاق، ۆەلوسيپەدشىلەرگە ارنالعان ءۇش مەترلىك جولاق، سونداي-اق ەنى 0،5 مەتر بولاتىن قاۋىپسىزدىك جولاعى جانە 0،5 مەترلىك شارباقتى قورشاۋعا ارنالعان ەكى جولاق بار. كوپىر جابىندىسى ءۇشىن ليتاكريل پايدالانىلعان. بۇل نىسان اۋا رايى جاعدايى ەسكەرىلە وتىرىپ سالىنعان. ونى جوبالاعاندا جەلدىڭ اسەرى دە ەسەپكە الىنعان. سالماعى – 1920 توننا.

ۆەلوسيپەدشىلەر مەن جاياۋ جۇرگىنشىلەرگە ارنالعان كوپىردى جانە ۆەلوسيپەد ينفراقۇرىلىمىن "وڭىرلەردىڭ استاناعا تارتۋى" جوباسى اياسىندا اتىراۋ، تۇركىستان، سولتۇستىك قازاقستان، پاۆلودار، قوستاناي، اقمولا جانە جامبىل وبلىستارىنىڭ اكىمدىكتەرى تۇرعىزدى.

پرەزيدەنتتىڭ ەسىل وزەنىنىڭ جاعالاۋىنا جاساعان كىشىگىرىم ساپارى ەلوردا تۇرعىندارىنا ادەمى اسەر سىيلاعانى سونشالىق، ولار كوپكە دەيىن تاراماي، جاڭا كوپىردىڭ جانىندا سۋرەتكە ءتۇسىپ، ءماز بولىستى.