شىمكەنتتە ەر ادام پودەزگە كىرگىزىپ، شابۋىل جاساعان بالانىڭ اجەسى وقيعانىڭ ءمان-جايىن ايتىپ بەردى. 

حالىقتىڭ جاعاسىن ۇستاتقان ۆيدەو كەشەلى بەرى قىزۋ تالقىعا تۇسكەن ەدى.

«مەن جۇمىستا بولدىم، ال بالا ەسىك الدىندا ويناپ ءجۇردى. ۇلكەن ۇلىم حابارلاسىپ، بالانى ءبىر ەر ادامنىڭ ۇرعانىن ايتتى. ۇيگە قاراي تۇرا جونەلدىم. كەلسەم، كورشىلەر اۋلاعا جينالىپ العان. پوليسيا شاقىردىق. ءبارى بالانى سۇراق استىنا الدى، الايدا ول دۇرىس سويلەي المادى، جىلاي بەردى»، - دەدى زارداپ شەككەن بالانىڭ اجەسى.

ال كۇدىكتىنىڭ قايدان شىعا كەلگەنى بەلگىسىز. اجەيدىڭ سوزىنشە، ەر ادام بالانى الدىمەن باسقا پودەزگە كىرگىزبەك بولعان. الايدا بالا قارسىلىق تانىتقان سوڭ ۆيدەوداعى اپارادى. ابىروي بولعاندا كورشىلەر بالانىڭ ايقايلاعان داۋىسىن ەستىپ، سوندا قاراي بارعان.

«اۋلادا وسى ۇيلەردىڭ بىرىندە تۇراتىن ەكى ايەل وتىرعان. كىشكەنتاي بالامەن پودەزگە كىرىپ كەتكەن بەلگىسىز ادام ولاردىڭ كۇدىگىن تۋدىرعان. ءسويتىپ سوڭىنان ەرەدى. ايتەۋىر، ۇلگەرىپ بارعان»، - دەدى بالانىڭ اجەسى.

بۇل ىسكە قاتىستى قالالىق ءىىد پوليسەيدىڭ بارلىق قاجەتتى شارالاردى جۇرگىزگەنىن مالىمدەدى. كۇدىكتى بىردەن ۇستالعان ەكەن. ءقازىر ول ۋاقىتشا ۇستاۋ يزولياتورىندا جاتىر.

پوليسيا دەرەكتەرىنە سايكەس، كۇدىكتى 1985 جىلعى شىمكەنت تۇرعىنى بولىپ شىقتى. ول كىناسىن تولىق مويىندادى. ال پەدوفيلدىڭ قۇربانى بولعان 11 جاستاعى بالا ءقازىر دارىگەرلەردىڭ باقىلاۋىندا.