ەلباسىنىڭ حالقىنا ارناعان جولداۋىندا كورسەتىلگەن ماقساتتار مەن مىندەتتەردى ورىنداۋدا اتىراۋدا دا ءبىرقاتار جۇمىستار اتقارىلۋدا، دەپ جازادى qamshy.kz اقپارات اگەنتتىگى اتىراۋ گازەتى تاراتقان اقپاراتتارعا سۇيەنىپ.
ءساندى ويىن-ساۋىق كەشەندەرى مەن بيزنەس ورتالىقتارىنىڭ، كوپ قاباتتى تۇرعىن ۇيلەردىڭ عيماراتتارىن سالۋ جۇمىستارى قارقىندى جۇرگىزىلۋدە. كوشەلەردى كەڭەيتۋ، اباتتاندىرۋ، جارىقتاندىرۋ ءىسى قالا ورتالىعىمەن قاتار، قالا ماڭىنداعى اۋىلداردا دا جالعاسىن تاۋىپ وتىر.
تاۋەلسىز ەلدىڭ ەرتەڭى – جاستار قولىندا. ەندەشە ولاردىڭ سپورتپەن كوبىرەك شۇعىلدانۋىنا، شىعارماشىلىق باعىتتا شىڭدالۋىنا، تۇرعىنداردىڭ مادەني-دەمالىسىن ۇيىمداستىرۋعا باسا نازار اۋدارىلعان. ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىن جۇزەگە اسىرۋدا اتىراۋ، اقساي اۋىلدىق وكرۋگتەرىندە زاماناۋي دەنە شىنىقتىرۋ-ساۋىقتىرۋ كەشەندەرى سالىندى. باعدارلاما اياسىندا قالا ورتالىعىندا «تەڭىزشيەۆرويل» ءجشس-نىڭ دەمەۋشىلىگىمەن «رەتروساياباق» پايدالانۋعا بەرىلدى. جۇمىسكەر شاعىناۋدانىندا مادەنيەت ءۇيى ءوز كورەرمەندەرىنە ەسىگىن ايقارا اشتى. اتالعان نىساندار قالا كوركىنە كورىك قوسىپ قانا قويماي، اتىراۋلىقتار مەن قوناقتار ءۇشىن تاماشا دەمالىس ورىندارىنىڭ بىرىنە اينالدى.
سونىمەن قاتار، ەركىنقالا، اقجار، جاڭاتالاپ اۋىلدارىندا تيپتىك ۇلگىدەگى مادەنيەت ۇيلەرىنىڭ قۇرىلىسى جالعاسسا، ەلوردانىڭ 20 جىلدىق مەرەكەسىنە وراي تومارلى اۋىلىندا سالىنعان 400 ورىندىق كەلبەتتى مادەنيەت ءۇيىنىڭ پايدالانۋعا بەرىلۋى اۋىل تۇرعىندارىنا ەرەكشە سىي بولماق.
ەلباسى مەن تاۋەلسىزدىك جانە ەلباسى مەن استانا ۇعىمدارى – بىر-بىرىنەن اجىراماس ەگىز ۇعىمدار. ەلباسىنىڭ ەرەن ەڭبەگىمەن تاۋەلسىزدىك العان العاشقى جىلدارى ەلىمىزدىڭ وزگە وڭىرلەرى سياقتى مۇنايلى استانا دا شىرايلى شاھارعا اينالا باستادى. قالانىڭ ەجەلگى تاريحي اتاۋى قايتارىلىپ، «اتىراۋ» قالاسى بولىپ اتالدى. ەركىندىك پەن تاۋەلسىزدىكتىڭ جولىندا قول باستاعان يساتاي تايمان ۇلى، ماحامبەت وتەمىس ۇلى سىندى باتىر دا اقىن، داۋىلپاز كۇيشى بابالارىمىزدىڭ ەسىمدەرى قوس اۋدانعا بەرىلدى. قوس اتقا قاتار قونعان باتىر بابالارىمىزدىڭ قۇرمەتىنە وبلىس ورتالىعىندا قولادان قۇيىلعان ەسكەرتكىش مۇسىندەرى ورناتىلدى.
قارقىندى دامىعان جاس مەملەكەتىمىزدىڭ ءار جىلى تاريح قويناۋىنا ەرەكشە وقيعالارمەن ەندى. قالانىڭ ساۋلەتتىك كەلبەتىنە كورىك بەرەر بىرنەشە ەسكەرتكىشتەر مەن مەموريالدار، كىشى-ساۋلەتتىك نىساندار سالىندى. تەك قانا سوڭعى جىلداردىڭ وزىندە ۇلى جەڭىستىڭ 70 جىلدىعىنا وراي «جەڭىس» ساياباعىندا مايدان دالاسىنان ورالماعان 27 مىڭنان استام بوزداق بابالارىمىزدىڭ ەسىمى جازىلعان «ەستەلىك تاقتا» مەموريالى اشىلسا، اۋعان، تاجىك-اۋعان جەرىندەگى سوعىستا جانقيارلىقپەن قازا تاپقان ەرجۇرەك ۇلدارىمىزعا ارنالىپ ەسكەرتكىش تۇرعىزىلدى. مەملەكەتتىك گيمن اۆتورلارىنىڭ ءبىرى جۇمەكەن ناجىمەدەنوۆ پەن مەملەكەتتىك سىيلىقتىڭ لاۋرەاتى، پوەزيا پاديشاسى فاريزا وڭعارسىنوۆاعا ەسكەرتكىشتەر ورناتىلدى.
ەلباسىنىڭ باعدارلامالىق ماقالاسى كوپتەگەن يگى ىستەرگە جول اشىپ، جاڭاشا سەرپىن بەردى. «وتكەندى بىلمەي، بولاشاقتى بولجاۋ مۇمكىن ەمەس» دەگەن حالىق دانالىعىن ۇستانعان وبلىس، قالا باسشىلىعى ۇلتتىق قۇندىلىقتارىمىزدى ۇلىقتاپ، ءداستۇرىمىزدى دارىپتەۋگە ارنال-عان، وتانىن، ۇلتىن سۇيۋگە، ۇرپاق تاربيەسىنە ەرەكشە اسەر بەرەتىن شارالارعا ۇلكەن ءمان بەرىپ، ايرىقشا قولداۋ كورسەتىپ كەلەدى. وبلىس جانە شاھار حالقىمەن وتكەن كەزدەسۋلەردە ايتىلعان ۇسىنىستار مەن پىكىرلەردى ەسكەرىپ، حالىق قاھارمانى حيۋاز دوسپانوۆانىڭ كىشى-ساۋلەتتىك ءمۇسىنىن، ۇلت رۋحانياتىنىڭ ايتۋلى تۇلعالارى، قازاقستاننىڭ حالىق جازۋشىلارى ءابۋ سارسەمبايەۆ پەن حاميت ەرعالييەۆكە، مەملەكەتتىك سىيلىقتىڭ لاۋرەاتى، داۋلەسكەر كۇيشى-كومپوزيتور قارشىعا احمەدياروۆقا ارناپ ەسكەرتكىش ورناتۋ قولعا الىندى.
