وسىدان 10 جىل بۇرىن 6 شىلدە – استانا كۇنى مەملەكەتتىك مەرەكەلەر تىزىمىنە ەنگەن بولاتىن. وسى كەزدەن باستاپ بۇل مەرەيلى داتا – ءوڭىرىمىزدىڭ ءار تۇكپىرىندە كەڭ كولەمدە تويلانىپ، ءتۇرلى مەرەكەلىك شارالار وتكىزىلىپ كەلەدى. بيىل دا بۇل ءۇردىس جالعاسىن تاۋىپ، ەلوردامىزدىڭ 20 جىلدىق مەرەيتويىن سەمەي جۇرتشىلىعى ەرەكشە اتاپ ءوتتى. 

ەڭ الدىمەن «ءبىز استانانىڭ قۇرداستارىمىز » دەگەن ۇرانمەن شاكارىم ۋنيۆەرسيتەتىنىڭ ستۋدەنتتەرى قالامىزداعى سەمەي وبلىستىق تاريحي-ولكەتانۋ مادەني مەكەمەسىنە، م. اۋەزوۆ اتىنداعى پەداگوگيكالىق كوللەدجىنىڭ مۇراجايىنا، سونىمەن قاتار دوستويەۆسكييدىڭ ادەبي-مەموريالدىق مۋزەيىنە بارىپ، تاريح بەتتەرىنەن سىر شەرتەتىن جادىگەرلەرمەن تانىستى. 

بۇدان كەيىن ەرتىس وزەنى جاعالاۋىندا قالا تۇرعىندىرىنىڭ قاتىسۋىمەن «Open Air – 2018» فەستيۆالى ۇيىمداستىرىلدى. شارا بىرنەشە ءبولىمدى قامتىپ، وتە قىزىقتى ساتتەرمەن ەستە قالدى. 
ناقتىراق ايتساق، 500-گە جۋىق جاستار بىر-بىرىنە قىزىلدى-جاسىلدى بوياۋ شاشىپ، اينالانىڭ بارلىعىن ءارتۇرلى تۇستەرمەن ارلەندىرە ءتۇستى. 

سالتاناتتى جيىن كونسەرتتىك باعدارلامامەن ۇلاسىپ، ۇيىمداستىرۋشىلار ازىرلەگەن كوپتەگەن سايىستارمەن جالعاسىن تاپتى. سونداي-اق، كەش سوڭىندا بايكەرلەر شەرۋى ءوتىپ، 14 جاسقا دەيىنگى بۇلدىرشىندەرىمىزگە تەگىن بالمۇزداقتار تاراتىلدى. 

-شىنى كەرەك، بۇل فەستۆالدى مەن ۇزاق كۇتتىم. ماعان ءقازىر بارلىعى وتە قاتتى ۇناپ جاتىر. كورىپ تۇرعاندارىڭىزداي، 5 مينۋت ىشىندە ادام تانىماستاي وزگەرىپ كەتتىم. بۇل يگى شارا الداعى ۋاقىتتا دا جالعاسىن تاپسا ەكەن. ۇيىمداستىرۋشىلارعا العىسىم شەكسىز، وسىنداي جوعارى دەڭگەيدە وتەدى دەپ ويلامادىم،-دەيدى شاراعا قاتىسۋشى توميريس قاجىبەكوۆا

 عانيبەك تۇسىپبەك