تۇركىستان وبلىسىنىڭ ورتالىعى – تۇركىستان قالاسىندا استانانىڭ 20 جىلدىق مەرەكەسىنە ارنالعان گالا-كونسەرت ءوتتى. ەسىمحان الاڭىندا وتكەن كونسەرتكە مىڭداعان كورەرمەن قاتىستى. سالتاناتتى شارادا تۇركىستان وبلىسىنىڭ اكىمى جانسەيىت تۇيمەبايەۆ كوپشىلىكتى مەرەكەمەن قۇتتىقتادى.
«قازاق ەلىنىڭ جاسامپاز تاريحىندا التىن ارىپپەن جازىلاتىن مەرەكەلەردىڭ ءبىرى – استانا كۇنى. ءبىز تاۋەلسىزدىگىمىز تۋرالى ايتساق، استانانى ايتپاي تۇرا المايمىز. ويتكەنى، ەلباسى جانە ەلوردا، تاۋەلسىزدىك پەن تۇڭعىش پرەزيدەنتتىڭ ەسىمى اجىراماس، اينىماس ەگىز ۇعىم. استانا – ەلباسىمىزدىڭ ءتول تۋىندىسى. سارىارقا توسىندە گاۋھارتاستاي جارقىراپ تۇرعان ەلوردامىز بۇگىنگى تاڭدا الەمنىڭ تاڭدانىسىن وياتقان، ءبارىن مويىنداتقان عالامات جوبا. بيىل استانانىڭ 20 جىلدىق مەرەيتويىن تويلاپ وتىرمىز. تاۋەلسىزدىگىمىزدىڭ بويتۇمارى – استانا كۇننەن كۇنگە جارقىراپ-جايناپ، ەلىمىزدىڭ ابىرويىن، مەملەكەتىمىزدىڭ كەلبەتىن اسقاقتاتىپ كەلەدى. استانا ەلىمىزدىڭ بارلىق وڭىرلەرىنىڭ ەكونوميكاسىنىڭ دامۋىنا ىقپال ەتكەن قوزعاۋشى كۇشكە اينالدى. استانا – بەيبىتشىلىك، ىنتىماقتاستىق جانە كەلىسىم ورداسى. سىزدەردى تاعى دا استانا كۇنىمەن شىن جۇرەكتەن قۇتتىقتاي وتىرىپ، بارلىقتارىڭىزعا زور دەنساۋلىق، وتباسىلارىڭىزعا اماندىق، باقىتتى عۇمىر تىلەيمىن» دەدى ج.تۇيمەبايەۆ.
دۋماندى مەرەكەدە ءوڭىر باسشىسى قوعامنىڭ ءتۇرلى سالالارىندا جەمىستى ەڭبەك ەتىپ جۇرگەن ءبىر توپ ازاماتقا «استاناعا – 20 جىل» مەرەكەلىك مەدالىن سالتاناتتى تۇردە تاپسىردى. ولاردىڭ اراسىندا سپورت، ونەر، ب ا ق جانە وزگە دە سالالاردىڭ وكىلدەرى بار. سونىمەن قاتار، ج.تۇيمەبايەۆ بيىل ۇبت قورىتىندىسى بويىنشا ەڭ جوعارى بالل جيناعان تۇركىستان وبلىسىنىڭ 20 ورەنىنە العىس حات تاپسىرىپ، ۇلكەن ومىرگە باسقان قادامدارىنا ءسات-ساپار تىلەدى.
تۇركىستان تورىندەگى گالا-كونسەرتتە وبلىسىمىزعا جانە ەلىمىزگە تانىمال ەسترادا جۇلدىزدارى مەن ونەر ۇجىمدارى ونەر كورسەتتى. كەشتە وتان، تۋعان جەر، ماحاببات، استانا، دوستىق تاقىرىبىنداعى تۋىندىلار مەن ەل جۇرەگىنەن ماڭگى ورىن العان اندەر شىرقالدى. كەش سوڭى مەرەكەلىك وتشاشۋعا ۇلاستى.
