جاپونيادا سۋ تاسقىنى سالدارىنان 100 ادام كوز جۇمدى، 50 ادام ءىز-تۇسسىز جوعالىپ كەتتى، دەپ حابارلايدى Qamshy.kz اقپارات اگەنتتىگى.  سۋ دەڭگەيى جىلدام كوتەرىلگەنى سونشالىق كەيبىر ادامدار ۇيىنەن شىعىپ ۇلگەرمەگەن. كەيبىرى ءۇيىندىنىڭ استىندا قالعان.

جۇزدەگەن ءۇي سۋدىڭ استىندا قالدى. ءبىر جارىم ميلليون تۇرعىنعا ۇيلەرىنەن جىراق جاققا كەتۋگە بۇيرىق بەرىلدى. ءۇش ميلليون ادام ەۆاكۋاسيالاندى.

«ءبىز بۇرىن-سوڭدى مۇنداي جاڭبىردى كورگەن ەمەسپىز» دەيدى جاپونيانىڭ مەتەورولوگيالىق اگەنتتىك وكىلى.

جاپونيا ۇكىمەتى توتەنشە جاعداي بويىنشا توتەنشە شتاب قۇردى. 54 مىڭ قۇتقارۋشى، ءورت ءسوندىرۋشى، اسكەريلەر مەن پوليسەي سۋ تاسقىنىنان ەڭ كوپ زارداپ شەككەن ەلدىڭ وڭتۇستىك-شىعىس بولىگىنە جىبەرىلدى.

ايتا كەتەيىك، جاڭبىر وتكەن اپتانىڭ سوڭىندا باستالعان. ءقازىر كوپتەگەن اۋدانداردا جاڭبىر توقتادى. سۋ تارتىلىپ جاتىر. جۇما كۇنى پويىزداردىڭ جۇمىسى جارتىلاي قالپىنا كەلتىرىلدى، الايدا جاپونيانىڭ كوپ جەرىندە سۋ تاسقىنى ءجۇرۋى مۇمكىن دەگەن ءقاۋىپ بار.

سيكوكۋ ارالىندا جاڭبىردىڭ دەڭگەيى 300 مم جەتەدى دەپ كۇتىلۋدە. ال توكيودان 600 شىقىرىم جەردە ورنالاسقان موتوياما قالاسىندا جۇمادان سەنبىگە قاراعان ءتۇنى 583 مم سۋ جينالعان.

جاپونيا بيلىگى اۋا رايىن ءجىتى باقىلاپ، تۇرعىندارعا الدىن الا ەسكەرتىپ وتىرسا دا ەلدە بيىك عيمارات پەن تاۋلى ايماقتاردا تۇرعىن ءۇي كوپ بولعاندىقتان كەز كەلگەن توتەنشە جاعدايدىڭ ارتى ۇلكەن تراگەدياعا اينالۋى مۇمكىن.

ساراپشىلار مۇنداي جاعدايدىڭ ورناۋىنا سوعىستان كەيىن جۇرگىزىلگەن ساياسات كىنالى ەكەنىن ايتادى. سەبەبى ورمانداردى جويۋعا رۇقسات بەرىلگەن. جاڭا اعاشتار وتىرعىزىلعانىمەن ولاردىڭ تامىرى سۋ تاسقىنى كەزىندە جەر قىرتىسىن ۇستاپ قالۋعا قاۋقارسىز.