الماتى قالاسىنداعى №32 كىتاپحانادا بەلگىلى ساياساتتانۋشى ايدوس سارىممەن كەزدەسۋ ءوتتى. جيىندى جاس قالامىزدىڭ 20 جىلدىق تورقالى تويىنا وراي الماتى قالاسى ىشكى ساياسات باسقارماسىنىڭ قولداۋىمەن «ەل-شەجىرە» قوعامدىق قورى ۇيىمداستىردى.
كەزدەسۋدە ساياساتتانۋشى باس قالانىڭ قۇرىلۋ كەزەڭى مەن بۇگىنگە دەيىنگى دامۋ قارقىنىنا توقتالىپ، وزىندىك ەرەكشەلىكتەرىن ءسوز ەتتى. ول«استانانى ارقاعا كوشىرۋدەگى باستى ماقسات – ەلىمىزدىڭ تۇتاستىعىن، بىرلىگىن ساقتاپ، حالىقتى قازاقىلاندىرۋ ەدى. 1997 جىلى ەلورداداعى قازاقتىڭ سانى 16-17% قۇراعان. ال ءقازىر 76-78 % -دىق كورسەتكىشتى كورسەتەدى. بۇل ارينە ۇلكەن جەتىستىك. 20 جىل بۇرىنعى مەن بۇگىنگى استانانى سالىستىرۋ تىپتەن مۇمكىن ەمەس. ءقازىر الىپ قالاعا اينالىپ، بەيبىتشىلىك، ىنتىماقتاستىق جانە كەلىسىم ورداسى رەتىندە ورنىقتى. ەلىمىزدىڭ ماقتانىشى، كوز قۋانىشى. بۇكىل حالىق ابىرويىنىڭ اسقاق كورىنىسى. جاس قالاعا دۇنيەجۇزى حالىقتارىنىڭ كوپشىلىگى تۋريستىك، ديپلوماتيالىق ساپارمەن قوناققا كەلىپ، الەۋمەتتىك-ەكونوميكالىق تۇرعىدان دامىپ كەلە جاتىر» -دەدى.
سونداي-اق، ەلوردانىڭ ەتنيكالىق كەلبەتىنىڭ قىر-سىرى، الەم ەلدەرىنىڭ تاريحىندا شاپشاڭ جىلدامدىقپەن قارىشتاعان ەڭسەلى شاھارعا اينالعانىنا ەرەكشە توقتالدى. بۇعان قوسا، ەلوردا الاتاۋدان ارقاعا كوشىرىلىپ، سولتۇستىكتى قازاقىلاندىرۋ بۇگىنگى ۋاقىتتا ءوز ناتيجەسىن بەرە العاندىعىن اڭگىمەگە ارقاۋ ەتتى.
«استانانى كوشىرۋ تۋرالى شەشىم شىققاندا كوپتەگەن پىكىرتالاس ورىن الدى. قولداۋشىلار دا، قارسى شىققاندار دا بولدى. ال بۇگىندە جۇيەلى جۇمىس پەن جوعارى ناتيجەنىڭ ارقاسىندا كوپتىڭ كوڭىلى ورنىنا ءتۇستى. ءبىز وسى كۇنىمىزگە شۇكىر ايتا ءبىلۋىمىز كەرەك. ويتكەنى، ءبىزدىڭ دەڭگەيىمىزگە جەتە الماي جاتقان، بەيبىت ەلدى اڭسايتىن ەلدەر قانشاما. نەبارى از ۋاقىت ىشىندە ادام تانىماستاي وزگەرگەن استانادان الداعى ۋاقىتتا دا كۇتەرىمىز كوپ. ەندى الداعى 10 جىل قازاق ءۇشىن تاعدىرلى، شەشۋشى، ءوزىنىڭ جاڭا بولمىسىن انىقتايتىن جىلدار بولماق. ونىڭ ىشىندە حالىق سانىنىڭ ءوسىمىن كۇشەيتۋ، قالالاردى قازاقىلاندىرۋ، رۋحاني، ساياسي احۋالدى بەكىتۋدى ودان ءارى كۇشەيتۋ كەرەك»- دەپ ءسوزىن ناقتىلادى.
ءىس-شاراعا قاتىسۋشىلار ايدوس سارىمعا كوكەيلەرىندەگى ساۋالدارىن قويدى. سونىمەن قاتار، ەلىمىزدىڭ ارى قارايدا ەگەمەندىگى ساقتالىپ، بوساعامىزدىڭ بەرىك بولعاندىعىن قالايتىندارىن جەتكىزدى. ساياساتتانۋشى دا ۇرپاق ساباقتاستىعى جالعاسىپ، ءبىلىمدى، سانالى جاستاردىڭ قاتارى كوبەيىپ كەلە جاتقانىنا قۋاناتىنىن ايتىپ، كەزدەسۋدى قورىتىندىلادى.
