جاقىندا عانا الماتى تورىنەن ورىن العان الىپ ءتيىننىڭ ءمۇسىنى  كۇتپەگەن جەردەن قوعامنىڭ قىزۋ تالقىسىنا ءتۇستى دە كەتتى. بۇل تاقىرىپتى قاۋزاماعان وتاندىق ب ا ق قالماعان شىعار، ءسىرا. ءتىپتى، شەت ەلدىڭ بۇقارالىق اقپارات قۇرالدارى دا ساباننان جاسالعان تيىنگە ەلەڭ ەتىپ، وزدەرىندە جازا باستادى. ماسەلەن، ءبىر عانا ءتيىن ءمۇسىنىنىڭ اينالاسىندا باس-اياعى 100-دەن استام ماقالا باسىلىپتى، دەپ جازادى Qamshy.kz اقپارات اگەنتتىگى الماتى-اقشامىنا سىلتەمە جاساپ.

بۇل جوبانىڭ ۇيىمداستىرۋشى اۆتورلارى دا، بريتاندىق سۋرەتشى  الەكس رينسلەر دە بيىكتىگى 13 مەتر بولاتىن ءتيىن ءبىر اپتانىڭ ىشىندە وسىنشالىقتى تانىمالدىلىققا يە بولادى دەپ ويلاماسا كەرەك. ونىڭ شاھارداعى «اتاكەنت» كورمە كەشەنىنىڭ الاڭىنان ورىن تەپكەن ءمۇسىنى ەلدەگى وزگە ماسەلەلەردى ىسىرىپ تاستاپ، حالىقتىڭ نازارىن، كوڭىلىن، ءسوزىن وزىنە اۋداردى.

ءتورت قاباتتى ءۇيدىڭ بيىكتىگىمەن تەڭەسەتىن ءتيىن، سالتاناتتى اشىلۋى بولماي جاتىپ-اق، الەۋمەتتىك جەلىلەردە كۇن-تۇن دەمەي قىزۋ تالقىعا ءتۇستى. ءجاي تالقىلانىپ قويعان جوق، ءمۇسىندى كادىمگى تاباعا سالىپ «شىجعىرىپ تۇرىپ قۋىرعاندار دا» تابىلدى.

ءيا، ۋىسىنا جاڭعاعىن ۇستاعان بەيكۇنا ءمۇسىن-تيىن قوعامدى اشۋلاندىردى دا، جاعىمسىز پىكىرلەرگە دە جول اشتى، ەرەكشەلىگىمەن تاڭداندىرىپ، تاڭداي دا قاقتىردى. ايتەۋىر بەسىكتەگى بالادان ەڭكەيگەن قارياعا دەيىن ەشكىمدى بەي-جاي قالدىرمادى. بۇل ەكو-مۇسىنگە رەسپۋبليكالىق بارلىق اقپاراتتىق پورتال، سايت، تەلەارنالار ارنايى ورىن بەرىپ، ەفيرلەرىن، پاراقشالارىن ارنادى. اشەيىندە مادەنيەت سالاسىنا قاتىستى الدەبىر جاڭالىقتار كوزگە ىلىنبەي قالىپ جاتۋشى ەدى. بۇل شىن مانىندە سەنساسيا بولدى دەسەك ارتىق ايتقاندىعىمىز ەمەس.