باتىس قازاقستان وبلىسىنىڭ قاراتوبە اۋدانىنداعى «قۇنىسكەرەي ۇڭگىرى» اتالىپ كەتكەن تاريحي ورىنعا العاشقى QR-كود تاقتايشا ورناتىلدى.

قاراتوبە اۋداندىق جاستارمەن جۇمىس جونىندەگى رەسۋرستىق ورتالىقتىڭ ۇيىمداستىرۋىمەن قويىلعان QR-كود تاقتايشا مول مۇمكىندىك بەرمەك. ياعني بۇل جەرگە كەلگەن كەز كەلگەن ادام سمارتفونمەن ارنايى ەنگىزىلگەن سۋرەتتى سكانەرلەۋ ارقىلى قۇنىسكەرەي ۇڭگىرى تۋرالى تولىقتاي اقپاراتتى الا الادى. ايتا كەتەرلىگى، بۇل باتىس قازاقستان وبلىسى بويىنشا كيەلى ورىندارعا قويىلعان العاشقى QR-كود. اۋدان جاستارىنىڭ ايتۋىنشا وسىنداي تاقتايشانى اۋدان اۋماعىنداعى باسقا دا كيەلى ورىندارعا ورناتۋ جوسپارلانۋدا. قۇنىسكەرەي ۇڭگىرى – ەگىندىكول اۋىلىنان 4-5 شاقىرىم جەردە ورنالاسقان. ءوز كەزەڭىندە بۇل ۇڭگىر بيلىك تاراپىنان قۋعىنعا  ۇشىراعان قۇنىسكەرەي باتىرعا پانا بولعان دەسەدى. جەرگىلىكتى تۇرعىندار بۇل ايتۋلى تۇلعانىڭ عاجايىپ وقيعاسىن ەستەرىندە ساقتاپ، وسى جەردى باتىس قازاقستان وبلىسىنىڭ كيەلى جەرلەرىنە  جاتقىزادى. اتالمىش تاقتايشانىڭ ورناتىلۋىنا بايلانىستى «تۋعان ولكەم – تۇنعان شەجىرە» اتتى شارا دا وزدىرعان بولاتىن.  جيىن بارىسىندا «اۋىلىم – التىن بەسىگىم» اتتى كورمە ۇيىمداستىرىلىپ، قاراتوبە اۋدانىنىڭ ەگىندىكول اۋىلىنىڭ تاريحى، كيەلى جەرلەرى مەن مەكتەبى تۋرالى ءۇش تىلدە باياندالدى. كورمەدەگى «اۋىلىمىزدىڭ ماقتانىشتارى» بولىمىندە  ولكەدەن شىققان تالانتتى تۇلعالار مەن جاۋىنگەرلەردىڭ ءومىر جولى تۋرالى ايتىلدى. سونىمەن قاتار، مەكتەپ وقۋشىلارىنىڭ «قۇنىسكەرەي تۇلعاسى» اتتى ساحنالىق قويىلىمى كورەرمەن نازارىنا ۇسىنىلدى.  شاعىن اۋىلدىڭ باي تاريحىنان سىر شەرتكەن شارادا اۋىل اقساقالى ەرتاي سەردالين ءسوز الىپ ۇيىمداستىرۋشىلارعا العىسىن ءبىلدىردى. رۋحاني جاڭعىرۋ ادامنىڭ تۋعان جەرىنىڭ تاريحىنان باستالاتىنىن ايتقان ول، جاستاردىڭ بويىنا پاتريوتتىق سەزىمدى ۇيالاتۋدا وسىنداي شارانىڭ ماڭىزدى ەكەنىن اتاپ ءوتتى.