جۋىردا ورال قالاسىندا قالدىقتاردى باسقارۋ جۇيەسىن جانداندىرۋ ماسەلەلەرىن تالقىلاعان سەمينار-كەڭەس ءوتتى.
شارادا وبلىس اكىمىنىڭ ءبىرىنشى ورىنباسارى يگور ستەكسوۆ ەلباسىنىڭ ءتۇرلى قوقىس قالدىقتارىن زاماناۋي تۇرعىدا پايداعا جاراتۋ جونىندەگى تاپسىرماسىن تىلگە تيەك ەتىپ، وڭىردەگى بۇل باعىتتا وڭ جۇمىستار اتقارىلىپ جاتقانىن ايتتى. سونداي-اق ول وسى سالادا ەڭبەك ەتىپ جۇرگەن وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ قىزمەتكەرى ايسۇلۋ ابدراحمانوۆا مەن «كاما-سەنتر» ج ش س ديرەكتورى ۆالەريي گولوۋحوۆقا ق ر ەنەرگەتيكا مينيسترلىگىنىڭ اتىنان «قۇرمەت بەلگىسىن» تابىس ەتتى.
ءوز كەزەگىندە ءسوز العان اتالمىش جيىننىڭ مودەراتورى، «Kaz Waste» قالدىقتاردى باسقارۋ بويىنشا قازاقستاندىق اسسوسياسياسىنىڭ اتقارۋشى ديرەكتورى ۆەرا مۇستافينا وڭىردە مۇناي-گاز، تاعى باسقا دا كاسىپورىندار كوپ بولعاندىقتان، وندىرىستىك قالدىقتار دا از ەمەس ەكەنىن اتاپ ءوتتى. سونداي-اق قوقىستاردى تۇرىنە قاراي ىرىكتەپ جيناۋدا اۋدان مەن اۋىلدىق جەرلەردەگى اتقارۋشى ورگاندار بەلسەندىلىك تانىتۋ قاجەتتىگىن ايتتى. ال وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى امانگەلدى داۋلەتجانوۆتىڭ ايتۋىنشا، وبلىستاعى قالدىقتار پلاستيكا، شينا، پايدالانىلعان مايلار، قۇرىلىس ماتەريالدارى جانە تاماق ونىمدەرى قالدىقتارى بولىپ تۇر-تۇرگە بولىنگەن. نەگىزىنەن اۋدان ورتالىقتارىنا جالپى قالدىقتار مەن پلاستيكاعا ارناپ قوقىس جاشىكتەرى قويىلۋدا. ماسەلەن، ورال قالاسىندا پلاستيكالىق بوتەلكەلەرگە ارنالعان 767، ال 12 اۋدانعا ءتۇرلى قالدىقتار جيناۋعا 317 كونتەينەر ورناتىلعان. ەندىگى جەردە بۇل يگى ىستەردىڭ اۋىلدىق وكرۋگتەردە دە جانداندىرۋ قاجەت. اسىرەسە، كوڭىلگە قونىمدى جۇمىستار تاسقالا مەن بوكەي ورداسى اۋداندارىندا جاقسى جولعا قويىلعان ەكەن. بۇگىندە وبلىستا قاتتى تۇرمىستىق قالدىقتاردى بولەكتەپ جيناپ، وڭدەيتىن 12 كاسىپورىن جۇمىس جاساۋدا.
بقو ەكولوگيا دەپارتامەنتى مەملەكەتتىك ەكولوگيالىق باقىلاۋ ءبولىمىنىڭ باس مامانى تولەگەن باقتىعالييەۆتىڭ ايتۋىنشا، وڭىردەگى ءوندىرىس قالدىقتارىنىڭ نەگىزى بۇرعىلاۋ قالدىقتارى بولىپ وتىر. جالپى وبلىستا وندىرىستىك قالدىقتاردى قايتا وڭدەيتىن بىرنەشە كاسىپورىن بار. وڭىردە پايدا بولعان وندىرىستىك قالدىقتاردى كادەگە جاراتۋ جانە قايتا وڭدەۋدىڭ ۇلەسى 33 پايىزدى قۇرايدى. ونىڭ ايتۋىنشا، وبلىستا جىلىنا ورتا ەسەپپەن 120-130 مىڭ تونناداي قاتتى تۇرمىستىق قالدىقتار (قتق) جيناقتالادى. بۇگىندە ولاردىڭ جالپى مولشەرى 6،5 مىڭ توننانى قۇراپ وتىر. جالپى قتق-نى كادەگە جاراتۋ ۇلەسى – 2،14 پايىز. ايتىپ ءوتۋ كەرەك، ءبىرىنشى جارتىجىلدىقتا اتالمىش دەپارتامەنت تابيعات پايدالانۋشىلارعا 115 تەكسەرىس جۇرگىزىپ، قالدىقتاردى ساقتاۋ تالاپتارىنا قاتىستى 130 قۇقىقبۇزۋشىلىق انىقتاعان. بۇگىندە بەرىلگەن 47 نۇسقاما تولىعىمەن ورىندالعان ەكەن. ال سالىنعان 34 ايىپپۇلدىڭ جالپى سوماسى 2 325، 635 مىڭ تەڭگە قۇراپ وتىر.
پىكىر قالدىرۋ