ماڭعىستاۋ وبلىسىندا بۇزىلعان قۇقىقتاردى قالپىنا كەلتىرۋگە باعىتتالعان «تۇنگى سوت» پيلوتتىق جوباسى ىسكە قوسىلدى. بۇل تۋرالى ماڭعىستاۋ وبلىستىق سوتىنىڭ باسپا ءسوز قىزمەتى مالىمدەدى، دەپ حابارلايدى Qamshy.kz اقپارات اگەنتتىگى digitalkz.kz سايتىنا سىلتەمە جاساپ.
اتالعان جوبانىڭ ماقساتى – جابىرلەنۋشىلەردىڭ بۇزىلعان قۇقىقتارىن قالپىنا كەلتىرۋ، ۋاقىتتى ۇنەمدەۋ، ماتەريالدىق شىعىندى ازايتۋ، ءىستى تەزىرەك شەشۋ. مۇنىڭ بارلىعى اۋديو-بەينەجازبالار ارقىلى ەلەكتروندىق فورماتتا قارالادى.
«سيفرلىق تەحنولوگيالار اكىمشىلىك ىستەردى انىقتاۋعا جاردەمدەسىپ جاتىر. ياعني، تۇنگى ۋاقىتتا ورىن الاتىن جول-كولىك اپاتتارى تۋرالى مالىمەتتەر بىردەن بازاعا ءتۇسىرىلىپ، سول مەزەتتە قارالادى. بۇل ءوز كەزەگىندە ۋاقىتتى قىسقارتۋعا ءوز ۇلەسىن قوسىپ، اكىمشىلىك ىستەر تاياۋ ۋاقىتتا ءوز شەشىمىن تاۋىپ جاتىر»، - دەيدى اقپاراتتىق قامتاماسىز ەتۋ ءبولىمىنىڭ باسشىسى گاۋحار نۇرحانوۆا.
ونىڭ ايتۋىنشا، سوت پروسەدۋرالارىن سيفرلاندىرۋ وڭ ناتيجەلەرگە جەتكىزەدى. اتاپ ايتقاندا، ەلەكتروندىق فورماتقا اۋىسۋ قاعازباستىلىقتان قۇتقارىپ، ۋاقىتتى ۇنەمدەمەك.
«بۇرىن سوت قىزمەتكەرلەرى سەنبى، جەكسەنبى كۇندەرى قاعاز تولتىرۋ ءۇشىن جۇمىسقا شىعاتىن. ال، ءقازىر ونداي جوق. نەگە دەسەڭىز ءبارىن اپپارات جازادى. وسىلايشا، ۋاقىتتى ۇنەمدەۋگە ەداۋىر جاردەم جاساۋدا. كۇن وتكەن سايىن ءتۇرلى ماسەلەلەر تۋىنداپ، ازاماتتىق ىستەر كوبەيۋدە. وسى رەتتە جاڭا تەحنولوگيالار جۇمىسىمىزدى ۋاقىتىلى رەتتەۋگە مۇمكىن بەرەدى» – دەدى گ. نۇرحانوۆا.
سونىمەن قاتار، ول سيفرلاندىرۋدىڭ تيىمدىلىكتەرىن باسا ايتىپ، اۋىلداعى اعايىن ءۇشىن ماڭىزدى ەكەنىنە توقتالدى.
«سيفرلاندىرۋ ەكونوميكالىق تۇرعىدان ءتيىمدى. بۇرىن بىرنەشە توننالاپ قاعاز كوتەرىپ جۇرەتىن سوت قىزمەتكەرلەرى ءۇشىن ەلەكتروندىق جۇيە ايتارلىقتاي ءتيىمدى. ءتۇرلى جاعدايلار بويىنشا سوت ىسىنە كەلە الماي قالاتىن ادامدار ءۇشىن ەلەكتروندىق جۇيە اسا ماڭىزدى. ياعني، قيىن جاعدايداعى ادامدارعا كوپ جەڭىلدىك بولىپ وتىر. سونداي-اق، اۋىلدى ەلدى مەكەننەن كەلۋشىلەر ءۇشىن كوپ كومەگى بار. وسى رەتتە، ولار ءوز ريزاشىلىقتارىن بىلدىرۋدە»، - دەدى ءبولىم باسشىسى.
قازاقستانداعى سوت جۇيەسىن سيفرلاندىرۋ پروسەسىنە كەلەر بولساق، سوڭعى جىلدارى سوت رەفورمالارىنىڭ ناتيجەسىندە بۇل سالاعا اقپاراتتىق تەحنولوگيالار ەنگىزىلە باستادى. ياعني، سوت زالدارى قازىرگى زامانعا ساي ساپالى اۋديو-بەينەجازبا جۇرگىزۋگە ارنالعان قۇرالدارمەن جابدىقتالىپ، بارلىق ءىس-قاعازدار مەن قۇجات اينالىمدارى ەلەكتروندىق فورماتقا اۋىستى. سونىمەن قاتار، ءبىرقاتار ەلەكتروندىق سەرۆيستەر جۇمىس ىستەيدى. اتاپ ايتساق، «تورەلىك» اقپاراتتىق جۇيەسى، «سوت كابينەتى»، دىبىس پەن بەينە جازبا قۇرىلعىلارى، بەينە-كونفەرەنس-بايلانىس جۇيەسى، «ەلەكتروندى قىلمىستىق ءىس» جوباسى، ەلەكتروندىق سيفرلىق قولتاڭبا، «ۆيرتۋالدى سوت» جوباسى، «قۇقىقتىق قىزمەت ورتالىعى» مەن «تەرگەۋ سوتى» جوباسى جۇمىس ىستەيدى.
