الماتىدا Kokjailau Challenge حاكاتونىنىڭ فينالدىق كەزەڭىندە  «Smart Kokjailau» ەكولوگيالىق جوباسى جەڭىمپاز بولىپ تانىلدى دەپ حابارلايدى Qamshy.kz اقپارات اگەنتتىگى digitalkz.kz سايتىنا سىلتەمە جاساپ.

حاكاتوننىڭ جەڭىمپازى «Smart Kokjailau» ەكولوگيالىق جوباسىنىڭ اۆتورى Geek Partners كومپانياسىنىڭ قولداۋىمەن سينگاپۋرداعى تۋريزم سالاسىنداعى يننوۆاسيانىڭ قىر-سىرىمەن تانىسىپ، تاجىريبە جيناۋعا جىبەرىلەدى. ال ەكىنشى جانە ءۇشىنشى ورىن يەگەرلەرى SAGE قاۋىپسىزدىك جوباسى جانە Journey (ۆيرتۋالدى شىندىق بويىنشا نۇسقاۋلىق) جوبالارى اقشالاي سىياقىمەن ماراپاتتالدى دەلىنگەن اتالعان سايتتا. 17 شىلدەدە وتكەن تاۋ كۋرورتىنىڭ ەكولوگياسىن جانە تۋريستىك الەۋەتىن جاقسارتۋ ءۇشىن سيفرلى قۇرالدارىن ۇسىنعان حاكاتوننىڭ اقتىق مارەسىندە ستارتاپەرلەردىڭ ۇزدىك جوباسىن انىقتاۋعا قۇرىلعان قازىلار القاسى قۇرامىندا Almaty Travel Lab جانە VisitAlmaty ورتالىقتارىنىڭ باسشىلارى بولدى. «كرەاتيۆتى تەحنولوگيالاردىڭ، smart شەشىمدەردىڭ شىعارماشىلىق ورتاسىندا ءومىر ءسۇرىپ جاتقان جاس كاسىپكەرلەردى، جاس عالىمداردى، ستارتاپەرلەردى وسىنداي  جوبالاردى جاساۋعا تارتۋ بۇگىنگى كۇنى اۋقىمدى ينفراقۇرىلىمدىق جوبالارمەن جۇمىس ىستەۋ ءۇشىن وتە ماڭىزدى»، – دەدى Almaty Travel Lab ورتالىعىنىڭ باسشىسى راشيد ديۋسەمبايەۆ. 

حاكاتونداعى باستى تاقىرىپ - ەكولوگيا. ماسەلەنى شەشۋ ءۇشىن ستارتاپەرلەر مەن جوبا ازىرلەۋشىلەردىڭ ونلاين-رەجيمدە تاۋ-شاڭعى كۋرورتىندا اۋانىڭ ساپاسىن جانە قورشاعان ورتانى قاداعالاۋ، رەسۋرستاردىڭ ءتيىمدى پايدالانىلۋىنا مۇمكىندىك بەرەتىن smart-قىزمەتتەر ويلاپ تابۋ كوزدەلدى.

سونداي-اق، بۇل مارافوندا كوزدەلگەن ماقساتتاردىڭ ءبىرى كۋرورتتىڭ مارشرۋتتارى، ەكولوگياسى، فلوراسى مەن فاۋناسى تۋرالى كەلۋشىلەردىڭ بىلىكتىلىگىن ارتتىرۋعا باعىتتالعان جوبا دايىنداۋ بولدى.

ايتا كەتەلىك، سيفرلىق قۇرالدار ارقىلى تۋريستىك الەۋەتتى دامىتۋعا باعىتتالعان، بۇنداي حاكاتون وسىمەن 5 مارتە وتكىزىلۋدە. 
بۇل جوبا VisitAlmaty رەسمي تۋريستىك اقپاراتتىق ورتالىعىنىڭ، «ارمان ايماعى» قوعامدىق قورىنىڭ جانە قالانىڭ تۋريزم جانە سىرتقى قاتىناستار باسقارماسىنىڭ قولداۋىمەن جۇزەگە اسىرىلادى.

حاكاتون – اعىلشىننىڭ hack جانە marathon سوزدەرىنىڭ قوسىلىپ دىبىستالۋىنان تۋىنداعان ينتەللەكتۋالدى مارافوننىڭ ءبىر ءتۇرى، باستى ەرەكشەلىگى قاتىسۋشىلاردىڭ كوماندالارى 24 ساعات ىشىندە ويلاپ تاپقان يدەيادان پروتوتيپكە كوشۋى. سوڭعى جىلدارى حاكاتوندى تەك باعدارلاماشىلارعا عانا ەمەس، باسقا دا سالالاردا اتاپ ايتاتىن بولساق ديزاينەرلەرگە، ماركەتولوگتارعا جانە باسقا ءپروفيلدى مامانداردىڭ اراسىندا ءجيى ۇيىمداستىرىلىپ كەلەدى.