ەلباسى «ءتورتىنشى ونەركاسىپتىك ريەۆوليۋسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىندا  زامان كوشىنەن قالماۋ قاجەتتىگىن ايتقانى ءمالىم. وسى ورايدا  ورال قالاسىنداعى «ورلەۋ» بىلىكتىلىكتى ارتتىرۋ ۇلتتىق ورتالىعى» اق-نىڭ فيليالى – باتىس قازاقستان وبلىسى بويىنشا پەداگوگيكالىق قىزمەتكەرلەردىڭ بىلىكتىلىگىن ساندىق تەحنولوگياعا ساي ارتتىرۋ ماقساتىندا جۇيەلى جۇمىستار جۇرگىزىپ كەلەدى. اسىرەسە، پەداگوگ قىزمەتكەرلەردىڭ بىلىكتىلىگىن ارتتىرۋ جۇيەسىندە سمارت تەحنولوگيالاردى ءجيى تۇتىنادى.

ايتا كەتسەك،  ينستيتۋت باسشىلىعى ورال قالاسىنداعى 40-تان استام ءبىلىم بەرۋ ۇيىمدارىنىڭ وكىلدەرىمەن مەموراندۋمعا قول قويىپ، وقۋ ورىندارىنداعى ءبىلىم بەرۋشىلەردىڭ ۇزدىك بەينەدارىستەرىن ينتەرنەتتە قولجەتىمدى كونتەنت رەتىندە ورنالاستىرۋ ماقساتىندا ەڭبەكتەنۋدە. ۇلتتىق ورتالىقتىڭ بەس جىلدىعىنا بايلانىستى «SMART-پەداگوگ ورلەۋ: كاسىبي تابىسقا اپارار جول» اتتى رەسپۋبليكالىق بايقاۋدىڭ بارلىق كەزەڭىندە قاتىسۋشىلار سانى جونىنە باتىسقازاقستاندىق پەداگوگتار الدىڭعى قاتاردا بولعان ەدى. ينستيتۋت جۇرگىزەتىن كۋرستار باعدارلاماسىندا قاشىقتان وقىتۋدىڭ تيىمدىلىگى جونىندە ايتىپ، جاڭا تەحنولوگيالاردى قولدانۋ جايىن قامتيدى. فيليالدا 100-گە تارتا قىزمەتكەر بار. ونىڭ 75 پايىزدايى – وقىتۋشى-ترەنەرلەر. جىلىنا 3 مىڭنان استام ءمۇعالىم جاڭا ءبىلىم بەرۋ ستاندارتىنا ساي وقيدى. ودان تىس اقىلى كۋرستار دا بار. وقىتۋ تەحنولوگياسىن ۇدايى جەتىلدىرىپ، كۋرستار مازمۇنىنا وزگەرىستەر ەنگىزىلۋدە. رەسپۋبليكا بويىنشا «ورلەۋ» باۇو» اق-عا قاراستى 17 ينستيتۋت ىشىندە دەڭگەيلىك كۋرستاردى وقىتۋ جونىنەن بىلىكتىلىك ارتتىرۋ ەمتيحانىن تاپسىرعاندا، باتىسقازاقاستاندىق ماماندار الدىڭعى قاتارلى كورسەتكىشكە قول  جەتكىزۋدە.

سونداي-اق سوڭعى جىلدارى ينستيتۋت ۇجىمى سيفرلىق تەحنولوگيالارعا نەگىزدەلگەن «ساباق جوسپارى»، «ماتەماتيكا وقۋلىعى»، «قاشىقتىق كۋرستارى»، «بىرگە وقيمىز» اتتى يننوۆاسيالىق جوبالاردى جۇزەگە اسىرىپ جاتىر. ونىڭ سوزىنشە، «ماتەماتيكا وقۋلىعى» جوباسى بويىنشا 1940-2015 جىلدارى ەلىمىزدە باسىلعان بارلىق ماتەماتيكا وقۋلىعى جيناقتالىپ، ساندىق (سيفرلىق) فورماتقا كوشىرىلەدى. وقۋلىقتاردىڭ ەلەكتروندى نۇسقالارى ارقىلى بۇرىنعى جانە قازىرگى ءبىلىم بەرۋ جۇيەسىندەگى ارتىقشىلىقتاردى سالىستىرىپ، ساباقتاستىرۋعا مۇمكىندىك تۋادى. قازىرگى ۋاقىتتا 130 ماتەماتيكا وقۋلىعى ينستيتۋت سايتىنا جۇكتەلگەن. جوبا ناتيجەسى كەيىن ق ر ءبىلىم جانە عىلىم مينيسترلىگىنە ۇسىنىلادى. ينستيتۋت كىتاپحاناشىلارى ي. باداقوۆا جانە ا. نۇرلانبايەۆانىڭ باستامالارىمەن «بىرگە وقيىق!» جوباسى اياسىندا قازاق اقىن-جازۋشىلارىنىڭ شىعارمالارىن ۇجىمدىق وقۋ، تالداۋ جانە قوعامعا ناسيحاتتاۋ قولعا الىنعان.