شىلدەنىڭ باسىندا شىمكەنت قالاسىندا قازاقستاندىقتاردى دۇرلىكتىرگەن وقيعا بولىپ ەدى. ەر ادام كىشكەنتاي بالانى پودەزگە كىرگىزىپ الىپ ايلاسىن ىسكە اسىرماق بولادى. الايدا پودەزگە ايەل كىرىپ قالىپ، بالا زورلىقتان امان قالادى. بۇل جاعداي پودەزد ىشىندەگى باقىلاۋ كامەراسىنا ءتۇسىپ قالدى. ال بەلگىسىز بىرەۋ ۆيدەونى الەۋمەتتىك جەلىدە تاراتىپ جىبەردى.

نە دە بولسا ءبۇلدىرشىننىڭ پسيحولوگياسى بۇزىلدى، ومىرىنە بالتا شابىلدى. سەبەبى الگى ەر ادام مەن ونىڭ ءىسى بالانىڭ كوز الدىندا ماڭگىگە قالىپ قويۋى ابدەن مۇمكىن. بۇل وقيعا بالادان بۇرىن بالانىڭ جاقىندارىنا قاتتىراق اسەر ەتتى.

پەدوفيلدىڭ قۇربانىنا اينالا جازداعان بالانىڭ اكەسى 40 جاسىندا جۇرەك ۇستاماسىنان قايتىس بولدى. تۋىستارىنىڭ سوزىنشە، بالانىڭ اكەسى بولعان جاعدايدى كوتەرە الماعان.

«وقيعادان ءبىر اپتادان كەيىن كۇيەۋ بالام قايتىس بولىپ كەتتى. جۇرەگى كوتەرمەگەن. مۇندايدى ەشكىمگە دە تىلەمەيمىن»، - دەدى بالانىڭ اجەسى 31 ارنانىڭ تىلشىسىنە.

ونىڭ ۇستىنە بالانىڭ اكەسى وتباسىنداعى جالعىز اسىراۋشى بولعان ەكەن.

پەدوفيلدىڭ ءوزى قازىرگى ۋاقىتتا ۋاقىتشا ۇستاۋ يزولياتورىندا وتىر. بالا ونىمەن بەتپە-بەت كەزدەسىپتى، تەك جانىندا پسيحولوگتار بولعان.

ءتورتىنشى ءسابيىن كۇتىپ جۇرگەن اناسى تاعى ءۇش بالاسىمەن جالعىز قالدى. تۋىستارى پەدوفيلگە ەڭ قاتال جازا قولدانۋدى سۇراپ وتىر. الايدا ساراپتاما ناتيجەلەرى ءالى دايىن ەمەس.