الماتى قالاسىنداعى №6 كىتاپحانادا كورنەكتى اقىن، حالىقارالىق «الاش» ادەبي سىيلىعىنىڭ لاۋرەاتى، «قۇرمەت» وردەنىنىڭ يەگەرى، «جۇلدىز» جۋرنالىنىڭ باس رەداكتورى عالىم جايلىبايمەن استانانىڭ 20 جىلدىعىنا وراي كەزدەسۋ ءوتتى. جيىندى الماتى قالاسى ىشكى ساياسات باسقارماسىنىڭ تاپسىرىسىمەن «ەل-شەجىرە» قوعامدىق قورى ۇيىمداستىردى.

كەزدەسۋدە قالامگەر جاس قالانىڭ الىپ قالاعا اينالىپ، ەلىمىزدىڭ كوركەيىپ، دامۋىنا قوسقان ۇلەسىن باياندادى. سونداي-اق، بۇرىنعى بولمىسى مەن بۇگىنگى ەتنيكالىق كەلبەتىن سيپاتتاپ، قالا تاريحىنا شولۋ جاسادى. ول ءوزىنىڭ كوپتەگەن ءان-جىرىنا استانانىڭ ارقاۋ بولعانىن ايتتى. «ەسىل اعادى» ءانى مەن «تاما كوشكەن» «قارا ورامال» پوەمالارىنىڭ اۆتورى كەزدەسۋدىڭ باسىن ەلوردا جايىندا جازىلعان رۋحتى ولەڭىمەن اشتى. جاسامپازدىقتى جالاۋ ەتكەن جاس قالانىڭ ساۋلەت قۇرىلىسى كوزدىڭ جاۋىن الىپ، ءزاۋلىم عيماراتتار جارىسا بوي كوتەرىپ جاتقانىن كەڭىنەن تارقاتتى. بۇعان قوسا، الاتاۋدان ارقاعا كوشىرىلگەن كوپتەگەن مەكەمەلەر مەن عىلىمي وشاقتاردىڭ بۇگىندە نىق ورنىققانىن، مۇراجاي مەن مۇراعاتتاردىڭ مۇرتى بۇزىلماعانى جايىندا اڭگىمەلەپ بەردى.

ول «سارىارقا توسىندەگى استانا – تاماشا جەتىستىكتەر مەن جەڭىستەرگە تولى XXI عاسىر عاجايىبى، الەمدىك مەگاپوليس، ارمان قالا رەتىندە بوي كوتەردى. ەلىمىزدىڭ تاۋەلسىزدىگى مەن ەگەمەندىگىن پاش ەتكەن مەملەكەتتىك ورتالىق بولىپ تانىلدى. بۇل ۇلتىمىزدىڭ قاۋىپسىزدىگىن، گەوساياسي ەركىندىگىن، تەرريتورياسىنىڭ مىزعىماستاي بەرىكتىگىن، ەل ەكونوميكاسىنىڭ قارقىندى دامۋ ستراتەگياسىن قامتاماسىز ەتەتىن جاڭاشىلدىققا بەتبۇرىس كەزەڭى دەۋگە بولادى. ال جاس قالانىڭ مەرەيلى تويى قازاق جۇرتى ءۇشىن قاشان دا ۇلى مەرەكە»، – دەدى. وسىعان وراي عالىم جايلىباي بۇل مەرەكەنىڭ ازاتتىعىمىزدى ارداقتاپ، استانامىزدى ۇلىقتايتىن شۋاقتى كۇن ەكەنىن ەرەكشە اتاپ ءوتتى.