استانا قالاسىنىڭ اكىمدىگىندە شاھارداعى مۇمكىندىگى شەكتەۋلى جاندارعا ارنالعان الەۋمەتتىك ينفراقۇرىلىم نىساندارىنىڭ قولجەتىمدىلىگىن تالقىلاعان ارنايى جيىن ءوتتى. وعان «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ، قالا باسشىسى، پارتيانىڭ استانا قالالىق فيليالىنىڭ ءتوراعاسى اسەت يسەكەشيەۆ جانە ۇكىمەتتىك ەمەس ۇيىم وكىلدەرى قاتىستى.

جيىن بارىسىندا ءسوز سويلەگەن پارتيا ءتوراعاسىنىڭ ءبىرىنشى ورىنباسارى «كەدەرگىسىز كەلەشەك» جوباسىن جۇزەگە اسىرۋدا ءتورت باعىت بويىنشا جۇمىس جاسالاتىنىن تىلگە تيەك ەتتى.

بۇگىندە پارتيا قىزمەتىن جاڭعىرتۋ اياسىندا ەلىمىزدەگى جەتەكشى ساياسي كۇشتىڭ «كەدەرگىسىز كەلەشەك» پارتيالىق جوباسىن قايتا جانداندىرىپ، وسى سالادا بەلسەندى ارەكەت ەتىپ جاتقانى ءمالىم. جوبانىڭ ماقساتى – ەلىمىزدەگى بارلىق مۇمكىندىگى شەكتەۋلى جانداردىڭ ءومىر ءسۇرۋ ساپاسىن جاقسارتۋ بولىپ تابىلادى. ماۋلەن اشىمبايەۆتىڭ ايتۋىنشا، پارتيا قۇر ستاتيستيكا ءۇشىن ەمەس، مۇمكىندىگى شەكتەۋلى جاندارعا ناقتى كومەك كورسەتۋ ءۇشىن جوبانى جۇزەگە اسىرۋدا ءتورت باعىتقا ەرەكشە باسىمدىق بەرەتىن بولادى.

– پارتيا قىزمەتىن جاڭعىرتۋ اياسىندا مۇمكىندىگى شەكتەۋلى جانداردىڭ ءومىر ءسۇرۋ ساپاسىن جاقسارتۋعا باعىتتالعان «كەدەرگىسىز كەلەشەك» پارتيالىق جوباسىن ودان ءارى جانداندىرىپ، تيىمدىلىگىن ارتتىرۋدى قولعا الدىق. سول ارقىلى ەرەكشە قاجەتتىلىكتى تالاپ ەتەتىن ازاماتتارعا ناقتى كومەك كورسەتۋگە باسىمدىق بەرىپ وتىرمىز. بۇل جوبانى جۇزەگە اسىرۋ بارىسىندا ءبىز ناقتى ءتورت باسىمدىقتى انىقتادىق. بىرىنشىدەن، مۇمكىندىگى شەكتەۋلى جاندارعا ارنالعان كەدەرگىسىز ورتا قالىپتاستىرۋ. ەكىنشىدەن، ولاردىڭ ينكليۋزيۆتى ءبىلىم الۋلارىنا ىقپال ەتۋ. ۇشىنشىدەن، جۇمىسقا ورنالاسۋلارىنا قولداۋ كورسەتۋ. تورتىنشىدەن، وسى سالاعا قاتىستى زاڭنامالاردى ودان ءارى جەتىلدىرۋ، – دەدى پارتيا ءتوراعاسىنىڭ ءبىرىنشى ورىنباسارى.

سونداي-اق ول ەلباسىنىڭ الدىمىزعا ەڭ دامىعان 30 ەلدىڭ قاتارىنا قوسىلۋدى باستى مىندەت ەتىپ قويعانىنا نازار اۋدارىپ، مۇنداي ماقساتقا قول جەتكىزۋ تەك ەكونوميكامەن عانا ولشەنبەيتىنىنە توقتالدى. ءتيىمدى الەۋمەتتىك ماسەلەلەردىڭ وڭتايلى شەشىلۋى دە بۇل ماسەلەدە باستى تالاپتاردىڭ ءبىرى بولىپ سانالاتىنىن تىلگە تيەك ەتىپ، بۇل جۇمىستاردا استانا ەلىمىزدىڭ وزگە وڭىرلەرىنە ۇلگى بولۋى تيىستىگىن اتاپ ءوتتى.

ءوز كەزەگىندە استانا قالاسىنىڭ اكىمى اسەت يسەكەشيەۆ وسى باعىتتا ەلوردادا اتقارىلىپ جاتقان جۇمىستار جايىن بايانداپ بەردى. سونداي-اق ەڭبەك جانە حالىقتى الەۋمەتتىك قورعاۋ مينيسترلىگى ەڭبەك كوميتەتى، الەۋمەتتىك قورعاۋ جانە كوشى-قون دەپارتامەنتى باسشىسىنىڭ ورىنباسارى ساۋلە ەگەمبايەۆا مەن استانا قالاسىنىڭ ساۋلەت، قالا قۇرىلىسى جانە جەر قاتىناستارى باسقارماسىنىڭ باسشىسى باقتىباي تايتالييەۆ تە كوتەرىلگەن ماسەلە بويىنشا ىستەلگەن جۇمىستارعا توقتالدى.

بۇدان باسقا، جيىن بارىسىندا «قازاقستان مۇگەدەكتەر كونفەدەراسياسىنىڭ» اتقارۋشى ديرەكتورى ءمادينا يبراگيموۆا، «دوس» تاۋەلسىز ءومىر» مۇگەدەكتەر ورتالىعى قوعامدىق بىرلەستىگىنىڭ اتقارۋشى ديرەكتورى قارلىعاش تانابەكوۆا، «ELAMAN» الەۋمەتتىك يننوۆاسيالىق جوبالار قورىنىڭ ءتوراعاسى الماز ەرجان جانە تاعى باسقا بەلسەندى ازاماتتار ءسوز الىپ، ءوز ويلارىمەن ءبولىستى.