ق ر مادەنيەت جانە سپورت ءمينيسترى ارىستانبەك مۇحامەدي ۇلى مانەرلەپ سىرعاناۋ شەبەرى دەنيس تەننڭ پىشاقتالۋىنا قاتىستى پىكىر ءبىلدىردى، دەپ حابارلايدى Qamshy.kz اقپارات اگەنتتىگى.

مينيستر Facebook-تەگى پاراقشاسىندا سپورتشىنىڭ باسىنان وتكەن جاعدايدى ۇلكەن قايعى دەپ اتادى.

«الماتىدان سۇمدىق جاڭالىق كەلدى. مانەرلەپ سىرعاناۋ شەبەرى دەنيس تەن رەانيماسيا بولىمىندە جاتىر. پىشاق جاراقاتىنان كوپ قان جوعالتىپتى. الماتى قالاسى ورتالىق كلينيكالىق اۋرۋحاناسىنىڭ دارىگەرلەرى سپورتشىنىڭ 3 ليتر قان جوعالتقانىن ايتىپ وتىر. ولار دەنيستىڭ ءومىرى ءۇشىن ارپالىسىپ جاتىر.

بۇل ۇلكەن قايعى. ميعا سىيمايدى. ءقازىر ءبارىمىز دەنيس تەننىڭ امان قالۋىن تىلەپ وتىرمىز»، - دەپ جازدى ارىستانبەك مۇحامەدي ۇلى.

ايتا كەتەيىك، بۇگىن مانەرلەپ سىرعاناۋ شەبەرى دەنيس تەندى پىشاقتاپ كەتتى. الماتى ءىىد اتالمىش جايتتىڭ ساعات 15:00 شاماسىندا بولعانىن ايتتى.

«بۇگىن 19.07.2018، ساعات 15:00 شاماسىندا قۇرمانعازى جانە بايسەيىتوۆا كوشەلەرىنىڭ قيىلىسىندا دەنيس تەن كولىگىنىڭ ايناسىن ۇرلاماق بولىپ جاتقان جەرىنەن بەلگىسىز ەكى ادامدى كورىپ قالعان. سول جەردە كيكىلجىڭ تۋىپ، دەنيس تەنگە پىشاق جاراقاتى سالىنعان.

اتالمىش ىسكە قاتىستى تەرگەۋ جۇمىستارى باستالىپ، كۇدىكتىلەردى انىقتاۋ جانە ۇستاۋ شارالارى جۇرگىزىلۋدە. الماتى ءىىد-نىڭ بۇكىل جەكە قۇرامى جۇمىلدىرىلدى»، - دەلىنگەن حابارلامادا.