الماتى مۋزەيىندە «رۋحاني جاڭعىرۋ» زالى اشىلدى.

بۇل زالدا  «قازاقستاننىڭ كيەلى جەرلەرىنىڭ گەوگرافياسى» جوباسىنا ەنگەن الماتى قالاسى اۋماعىندا ورنالاسقان نىساندار - «تاۋەلسىزدىك تاڭى» مونۋمەنتى،  قازىرگى قازاق-بريتان تەحنيكالىق ۋنيۆەرسيتەتى ورنالاسقان  عيمارات، ۆوزنەسەن سوبورى، ا. بايتۇرسىن ۇلىنىڭ مۋزەي-ۇيى، «بورالداي ساق قورعاندارى» ارحەولوگيالىق پاركى، رايىمبەك باتىر كەسەنەسى تۋرالى تولىق مالىمەتتەرمەن تانىسۋعا بولادى.

ەكسپوزيسيانىڭ اۋقىمدى ءبىر بولىگى «100 جاڭا ەسىم» جوباسىنا ەنگەن 20 جەرلەسىمىزگە ارنالعان. كورمە سورەسىنە قازاقستاننىڭ جۇزدىگىنە ەنگەن الماتىلىقتاردىڭ ەڭبەكتەرى مەن ماراپاتتارى قويىلعان. سونىڭ ءبىرى - جاس ونەرتاپقىش ماۋلەن بەكتۇرعاننىڭ ويلاپ تاپقان بيونيكالىق پروتەزى.

سونداي-اق، قازاق ءالىپبيىن لاتىن گرافيكاسىنا كوشىرۋ تۋرالى اقپارات، قازاق تىلىندە باسىلىپ شىعاتىن 100 الەم وقۋلىقتارىنىڭ 18ء-ى وسى زالدان ءوز ورنىن تاپقان.

"الماتى قالاسى مۋزەيلەرىنىڭ بىرلەستىگى" قمكك ديرەكتورىنىڭ ورىنباسارى قايرات تاربايەۆ: «رۋحاني جاڭعىرۋ» باعدارلاماسىنىڭ توڭىرەگىندە ىسكە اسىرىلىپ جاتقان جۇمىستار قاراپايىم حالىققا تۇسىنىكتى  بولۋى كەرەك. بۇل كورمە ەلباسىمىز ن. ءا. نازاربايەۆتىڭ «بولاشاققا باعدار: رۋحاني جاڭعىرۋ»    باعدارلاماسى اياسىندا اتقارىلعان ءىستىڭ ەسەبى ىسپەتتەس. «رۋحاني جاڭعىرۋ» باعدارلاماسى تەك قانا قۇجات، جوسپار تۇرىندە عانا جۇزەگە اسپاۋى ءتيىس، قاراپايىم حالىققا قولجەتىمدى بولۋى كەرەك»، - دەيدى.