الماتىدا استانا كۇنىنە تارتۋ رەتىندە 20 مەرتلىك قۇراق كورپە تىگىلدى. مەرەكەلىك شارا ورتالىق مادەنيەت جانە دەمالىس ساياباعىندا اتالىپ ءوتتى.

الماتىدا «ناۋرىز-2018» مەرەكەسى اياسىندا قولعا الىنعان ەڭ ۇزىن قۇراق كورپە تىگۋ جۇمىسى بۇگىنگى شارادا جالعاسىن تاپتى. مەدەۋ اۋدانىنىڭ «اجەلەر» ءانسامبلى قالا تۇرعىندارى مەن قوناقتارىنا ارناپ  قۇراق كورپە تىگۋدەن شەبەرلىك ساباعىن وتكىزدى. 

مەگاپوليستە «گينەسستىڭ رەكوردتار كىتابىنا» ەنۋ ءۇشىن ۇزىندىعى 25 500 شارشى  مەتر كورپە تىگۋ جوسپارلانعان. سونىڭ ۇلەسى رەتىندە استانا كۇنىنە وراي كورپەنىڭ 20 مەترلىك بولىگى بۇگىن تىگىلدى.

شارا اياسىندا قولونەر مەن ساندىك قولدانبالى ونەر جارمەڭكەسى ءوتتى. مەرەكە باقىتجان بايقاداموۆ اتىنداعى مەملەكەتتىك حور كاپەللاسىنىڭ قاتىسۋىمەن كونسەرتتىك باعدارلاماعا ۇلاستى.

ال ساياباقتىڭ كىشكەنتاي قوناقتارىنا استانانىڭ قوناقجاي كورىنىسىنەن حابار بەرەتىن ەكسكۋرسيا وتكىزىلدى. سونداي-اق ولار سۋرەت سالۋدان ءوزارا سايىسقا ءتۇستى.

مەرەكەلىك شاراعا ۇيىتقى بولعان مەدەۋ اۋدانى اكىمدىگى قىزمەتكەرلەرىنىڭ ايتۋىنشا، استانا كۇنى اتاۋلى كۇندەر اراسىنان  لايىقتى ورنىن العان.

«استانا كۇنى - حالىق ءۇشىن تاريحي-مادەني ءمانى زور مەرەكە. جاس قالامىز رەسپۋبليكامىزدىڭ وسى كۇنگە دەيىن جەتكەن جەتىستىگىنىڭ سيمۆولى. بۇل كۇننىڭ مەملەكەتتىك مەرەكە بولىپ بەكىتىلۋى وتە ادىلەتتى. جاس استانامىزبەن ماقتانامىز. بۇعان ەلباسىمىزدىڭ سىڭىرگەن ەڭبەگى مول»،-دەدى الماتى قالاسى  مەدەۋ اۋدانى اكىمىنىڭ شتاتتان تىس كەڭەسشىسى جاننا دوسانوۆا.