الماتىدا ەديت پيافتىڭ اندەرى ۇلتتىق اسپاپتار سۇيەمەلدەۋىمەن شىرقالدى. استانا كۇنىندە الاتاۋ ءداستۇرلى ونەر تەاترىنىڭ ەتنوفولكلورلىق ءانسامبلى ەتنومودەرن ستيلىندە اننەن شاشۋ شاشتى.

الماتىدا استانا كۇنىن تويلاۋ اربات الاڭىنان باستالدى. ەلوردانىڭ 20 جىلدىق مەرەيتويىنا ارناپ «الماتى-استانا: مادەني كوپىر» فوتوكورمەسى ۇيىمداستىرىلدى. جاس سۋرەتشىلەر استانا مەن الماتىنىڭ رۋحاني بايلانىسىن شەبەر بەينەلەگەن.

«فوتوكورمە الەمدىك مادەني ورتالىقتارداعى يننوۆاسياعا ۇمتىلىس پەن ىنتىماقتاستىقتى كورسەتىپ، جاس مەملەكەت تاجىريبەسىنىڭ ۇرپاققا ۇلگى بولاتىندىعىن دالەلدەيدى. وسى كورمە ەلىمىزدىڭ ەكى باس قالاسى تىعىز بايلانىستا دامىپ، ءبىر-بىرىن ۇيلەسىمدى تولىقتىراتىنىن كورسەتەدى»، - دەدى ۇيىمداستىرۋشىلار.

الاتاۋ ءداستۇرلى ونەر تەاترىنىڭ ونەرپازدارى ءان مەن جىردان شاشۋ شاشتى. اربات الاڭىنان الەم حالقىنىڭ جۇرەگىنەن ورىن تاپقان ەديت پيافتىڭ اندەرى ءداستۇرلى اسپاپتىڭ سارىنىمەن شالقىدى.

«قازاق مەملەكەتى مەن فرانسيانىڭ دوستىق قارىم-قاتىناسى الدەقاشان ورنىققان. مادەني بايلانىسى ودان ءارى نىعايىپ كەلەدى. سونىڭ ءبىر دالەلى - سوربوننا-قازاقستان ينستيتۋتى. الاتاۋ ءداستۇرلى ونەر تەاترى ەكى ەلدىڭ دوستىعىن حالىققا جەتكىزگىسى كەلدى. تەاترىمىزدىڭ تالانتتى جاستاردان تۇراتىن ەتنوفولكلورلىق ءانسامبلى ءداستۇرلى ونەردى زامانعا ساي وڭدەپ، ورىندايدى. بۇگىن ەديت پيافتىڭ «Non، je ne regrette rien»، فرانسۋز ءانى «Derniere Danse» جاندى داۋىستا، وركەستردىڭ سۇيەمەلدەۋىمەن ورىندالادى»،-دەدى تەاتردىڭ باسپا ءسوز حاتشىسى گۇلميرا قاجييەۆا.