الماتىدا 2ا كاتەگوريالىق قيىندىقتا «نۇرسۇلتان شىڭىن» باعىندىرۋ الپينياداسى ءوتتى. الپينياداعا 12 جاستان اسقان 5 مىڭنان استام ادام 4376 مەتر بيىكتىكتى باعىندىرۋعا نيەت بىلدىرگەنىمەن، ولاردىڭ 200-دەن استامى عانا شىڭعا شىعا الدى. قاتىسۋشىلاردىڭ اراسىندا وزگە مەملەكەت قوناقتارى، سونداي-اق الماتى قالاسى دەنە شىنىقتىرۋ جانە سپورت باسقارماسىنىڭ باسشىسى ءابىل دوڭبايەۆ تا بولدى.

شارانىڭ اشىلۋ سالتاناتىندا ەلىمىزدىڭ بەلگىلى ءالپينيستى ماقسۇت جۇمايەۆ قوناقتاردى استانا كۇنىمەن قۇتتىقتاپ، الپينيزممەن اينالىسۋعا كەڭەس بەردى.

ايتا كەتەيىك، الپينيادامەن ءبىر مەزگىلدە «شىمبۇلاق» تاۋشاڭعى كۋرورتىندا سكايراننينگ سپورتىنان قازاقستان چەمپيوناتى باستالدى. بىرنەشە جاس ايىرماشىلىق بويىنشا 100-دەن استام سپورتشى ءوز باقتارىن سىناپ كورۋگە تىرىستى. سولاردىن ءبىرى، جۇلدەلى ورىن العان راۋان ابىلحانوۆ ءوز ويىمەن ءبولىستى.  

«دايىندىق تاۋدا ەمەس، قالادا ءوتتى. ءوزىم وسى جارىسقا ءجيى قاتىسامىن. ماعان جۇگىرگەن وتە ۇنايدى. بۇگىن ءوز جاسىم بويىنشا - ءبىرىنشى، ال «ابسوليۋتتە» ءۇشىنشى ورىن الدىم. ۋاقىتىم - 1 ساعات 53 مينۋت»، - دەدى اسكەري ينستيتۋتىنىن سەرجانتى راۋان ابىلحانوۆ.  

سكايراننينگتىڭ بارلىق جۇلدەگەرلەرى مەن جەڭىمپازدارى مەدالدارمەن، ال الپينيادا قاتىسۋشىلارى سەرتيفيكاتتارمەن ماراپاتتالدى.  

اتالمىش شارالار سالاۋاتتى ءومىر سالتىن ۇستانىپ، جاستار اراسىندا سپورتتى دامىتۋ ماقساتىندا جىل سايىن وتكىزىلەدى.