الماتىنىڭ ورتالىق مادەنيەت جانە دەمالىس ساياباعىندا جازدىڭ ءتاتتى مەرەكەسى - «بالمۇزDay». شىعىس ەرتەگىسى»  فەستيۆالى وتەدى.

بيىل فەستيۆال ەكى كۇن تويلانادى. الماتىداعى ورتالىق مادەنيەت جانە دەمالىس ساياباعىنىڭ ساحناسىندا قوناقتاردى عالامات شوۋ كۇتەدى.

«14-15 شىلدەدە الماتىداعى ورتالىق مادەنيەت جانە دەمالىس ساياباعى شىعىستىڭ ەرتەگىدەي اتموسفەراسىنا ەنەدى. دەمالىس الاڭى تاتتىگە تولى شىعىس بازارىنا اينالىپ، ويىن-ساۋىقتىڭ ورتاسى بولادى. 2 كۇن ىشىندە الماتىلىقتار مەن قالا تۇرعىندارى بالمۇزداقتىڭ تۇر-تۇرىنەن: ىستىق بالمۇزداق، بيو-بالمۇزداق، ازوت-بالمۇزداعى، قىمىزدان جاسالعان بالمۇزداقتان جانە ءتۇرلى تاتتىلەردەن ءدام تاتا الادى»،-دەيدى ۇيىمداستىرۋشىلار.

فەستيۆالدىڭ العاشقى كۇنى قوناقتار مۋزىكا مەن تەاترلاندىرىلعان قويىلىمدارعا كۋا بولادى. شارانىڭ ءار قاتىسۋشىسى باعالى سىيلىقتار ۇتىسى مەن فلەشموبقا قاتىسا الادى.

«ەكىنشى كۇنى مۋزىكالىق كونكۋرس - «بالمۇزDay داۋىسى-2018» كاراوكەسى ۇيىمداستىرىلادى. بايقاۋعا 3-تەن 16 جاسقا دەيىنگى بالالار قاتىسا الادى. جەڭىمپازدار گرۋزياداعى تالانتتار بايقاۋىنا جولداما الادى. قاتىسۋشىلاردىڭ ۆوكالدىق مۇمكىندىگىن جۇلدىزدى قازىلار القاسى باعالايدى»، - دەيدى ۇيىمداستىرۋشىلار.

ايتا كەتۋ كەرەك، ءداستۇر بويىنشا فەستيۆالگە بالالار ءۇيىنىڭ تاربيەلەنۋشىلەرى شاقىرىلادى. ولار قۇندى سىيلىقتارعا يە بولىپ، اتتراكسيونداردا تەگىن ويناي الادى.