"ايتقانىم سىزگە ۇناماس. ءبىراق اقيقاتتى ايتاتىن كەز كەلدى دەپ ويلايمىن. ونى ءدال ءقازىر قابىلداي الماساڭىزدار دا، بولاشاق ۇرپاق تۇسىنەدى دەگەن زور ۇمىتتەنەمىن. "قازاقتىڭ ماقتانىشى كىم؟" دەسەڭ، ءبارى "اباي" دەيدى. مەن مۇنىمەن كەلىسپەيمىن. ابايدى ءوز باسىم مويىندامايمىن. اباي قانداي جاقسىلىعى ءۇشىن وسىنشالىقتى دارىپتەلەدى؟ قيىن-قىستاۋ زاماندا قول باستادى ما الدە ەل باسقاردى ما؟ ول ءتىپتى اۋىل باسقارعان ەمەس. اباي اقىلدى، جاقسى ادام. ءبىراق بۇكىل قازاق ۇلگى بولارلىقتاي كەمەڭگەر تۇلعا ەمەس. وسىنى ەسكەرسەڭىزدەر. ابايدىڭ اكەسى قۇنانبايدىڭ ازاماتتىعىنا ءسوز جوق. ەل باسقاردى. شىنىمەن دە ۇلگى بولارلىق تۇلعا. اباي ءبىزدىڭ زامانىمىزدا ءومىر سۇرسە، ءارى كەتسە تانىمال بلوگەر عانا بولاتىن ەدى. بۇل تۋرالى ول ءوز كىتابىندا سىر اقتارعان بولاتىن. ءبىرىنشى قارا سوزىندە "وسى جاسقا كەلىپ نە ءبىتىردىم، ەندى نە ىستەمەكپىن" دەگەن ويعا كەلەدى. ول كەزدە اباي 45-تە بولاتىن. دەمەك 45 جاسقا دەيىن اباي تۇك بىتىرمەگەن. قۇر قىدىرعان، دومبىرا تارتقان. ەشنارسە ىستەگىسى كەلمەگەن" دەيدى كاسىپكەر نۇرلان ءبايدىلدا. "وسىنىڭ ءبارىن نە ءۇشىن ايتىپ وتىرمىن، ماقساتىم نە؟" دەگەن سۇراققا ءوزى بىلاي دەپ جاۋاپ قاتادى كاسىپكەر: "كەڭەس ۇكىمەتى قازاقتىڭ يگى جاقسىلارىن قۇرتىپ تىندى. ءبىراق حالىقتى الداي تۇرۋى شارت ەدى. سوندىقتان ۇلگى بولارلىق تۇلعا رەتىندە ابايدى تاڭداپ الدى. اۋەزوۆ بولسا ارتىلعان مىندەتتى جوعارى دەڭگەيدە اتقارىپ شىقتى. اباي جاقسى جارنامالاپ بەردى. ءبىز ءالى كۇنگە دەيىن اباي سياقتىمىز. قازاق وتىرىپ الىپ ويلانعاندى، اسپانعا قاراپ ارمانداعاندى، ەشنارسە ىستەۋگە قۇلقى جوق، ومىردەن باز كەشۋگە دايار. مۇنىڭ ءبارى سول يدەولوگيانىڭ، جاقسى پياردىڭ تىكەلەي اسەرى. شىن مانىسىندە قازاقتا ۇلگى بولارلىق تۇلعالار كوپ. كەرەي مەن جانىبەك، قاسىم حان، ابىلاي حاندار ناعىز ازاماتتار. سولار سياقتى بولۋعا ۇمتىلۋىمىز ءتيىس. سوندا عانا مىقتى بولامىز. ەرىككەننەن ابايعا ءتيىسىپ وتىرعانىم جوق. قازاقتىڭ ناعىز قايسار ازاماتتاردى ۇلگى قىلىپ، سولارعا قاراپ بوي تۇزەگەنىن قالايمىن" دەپ ءسوزىن اياقتادى نۇرلان ءبايدىلدا.