الماتىدا 19-26 تامىز كۇندەرى ستۋدەنتتەر اراسىندا فۋتزالدان الەم چەمپيوناتى وتەدى. وسىعان وراي، «سپورتتىق الماتى» باعدارلاماسى اياسىندا فۋتبولدان قىزدار جانە ۇلدار اۋلا كوماندالارى اراسىندا ليگا ءوتتى.

جارىس ءال-فارابي اتىنداعى قازۇۋ ستاديونىندا وليمپيادالىق جۇيە بويىنشا وتكىزىلدى.  

ۇلدار مەن قىزدار اراسىندا وتكەن ويىنعا 800-دەن استام ادام قاتىستى. ونىڭ ىشىندە 40 قىز ب ا ق سىنادى. اراسىندا الەم چەمپيوناتىندا ونەر كورسەتەتىندەر دە بار.    

«ۇيىمداستىرۋشىلارعا وسىنداي تۋرنير ءۇشىن كوپ راحمەت. ءقازىر قىزدار فۋتبولىنا از كوڭىل بولىنۋدە. سوندىقتان بۇل كەلە جاتقان الەم چەمپيوناتىنا جاقسى داينىدىق. جاقىندا قىرعىزستانعا جيىنعا باردىق. كوماندامىزدىڭ قۇرامىنا ىرىكتەۋ جۇرگىزىلۋدە. جاقسى ناتيجە كورسەتەمىز دەپ ويلايمىز. مەن ءوزىم فۋتبول ويناعانىما كوپ بولدى. قازاقستان چەمپيوناتىنا ءجيى قاتىسامىن. وسىنداي الەمدىك دودادا ونەر كورسەتۋ - مەن ءۇشىن ۇلكەن مارتەبە»، - دەيدى اۋلا ليگاسىنا قاتىسۋشى جانە فۋتزالدان ۇلتتىق قۇرامانىڭ كاپيتانى رامينا مامەدوۆا.  

تۋرنير ناتيجەسىندە قىزدار كوماندالارى اراسىندا ءبىرىنشى ورىنعا قازستا ستۋدەنتتەرى يە بولدى. ال، ەكىنشى جانە ءۇشىنشى ورىندى «لەگيون» مەن «كوسموس» جەڭىپ الدى.  

ۇلدار اراسىندا ءبىرىنشى «ا» ليگاسىنا - 8-دەن 14 جاسقا دەيىنگى جاسوسپىرىمدەر قاتىسىپ، «قايرات» كلۋبى چەمپيون اتاندى. «ديەۆيل وف حەل» مەن «بوكەيxانوۆ» ويىنشىلارى كۇمىس پەن قولانى قاناعات تۇتتى.    

ال، ەكىنشى «ب» ليگاسىنا - 15 جاستان جوعارى ۇمىتكەرلەر قاتىستى. بۇل جەردە «وليمپ»، «لەگيون» جانە «تاستاق» ۇجىمدارى جۇلدەلى ورىنداردى ءوزارا ءبولىستى.    

جەڭىمپازدار مەن جۇلدەگەرلەر ديپلوم، مەدال، سىيلىقتارمەن ماراپاتتالدى.