قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ قازاق ءالفاۆيتىن لاتىن گرافيكاسىنا كوشىرۋ جونىندەگى ورتالىعىندا جاڭا ءالىپبيدى ۇيرەتەتىن ارنايى كۋرس اشىلدى. بۇل تۋرالى اتالعان وقۋ ورنىنىڭ باسپا ءسوز جانە قوعاممەن بايلانىس ءبولىمىنىڭ جەتەكشىسى جاندار اسان ايتتى.
وقۋ ورنىنىڭ بىلىكتىلىكتى جەتىلدىرۋ ورتالىعىنىڭ مۇرىندىق بولۋىمەن ۇيىمداستىرىلىپ وتىرعان كۋرستىڭ ماقساتى – مەملەكەت باسشىسىنىڭ «بولاشاققا باعدار: رۋحاني جاڭعىرۋ» ماقالاسىندا كورسەتىلگەن مىندەتتەردى جۇزەگە اسىرۋ ماقساتىندا كۋرس قاتىسۋشىلارىنا لاتىن گرافيكاسىنا نەگىزدەلگەن قازاق ءالىپبيىن ۇيرەتۋدىڭ وڭتايلى تەحنولوگيالارىن مەڭگەرتۋ، ءالىپبيدى وقىپ، ۇيرەتۋگە قاتىستى تەوريالىق جانە پراكتيكالىق بىلىمدەرىن جەتىلدىرۋ.
«لاتىن گرافيكاسىنا نەگىزدەلگەن قازاق ءالىپبيىن ۇيرەتۋدىڭ يننوۆاسيالىق ادىستەرى» اتتى كۋرس تىڭداۋشىلارى «قازاقستان رەسپۋبليكاسىندا ءبىلىم بەرۋدى جانە عىلىمدى دامىتۋدىڭ 2016-2019 جىلدارعا ارنالعان مەملەكەتتىك باعدارلاماسىنىڭ نەگىزگى قاعيدالارى»، «جاڭارتىلعان ءبىلىم بەرۋ باعدارلاماسىنىڭ ءتۇيىندى ەرەكشەلىكتەرى»، «رۋحاني جاڭعىرۋ» باعدارلاماسىنىڭ باعىتتارى»، «جاڭا قازاق ءالىپبيىنىڭ سوڭعى نۇسقاسى: ارتىقشىلىقتارى مەن كەمشىلىكتەرى، ۇسىنىستار»، «ءبىلىم بەرۋ ۇيىمدارىندا لاتىن ءالىپبيىن ۇيرەتۋدى ۇيىمداستىرۋ كەزەڭدەرى، ەرەكشەلىكتەرى»، «جاڭا قازاق ءالىپبيىن ۇيرەتۋدىڭ ناتيجەگە باعىتتالعان وقۋ ادىستەرى»، «جاڭا ءالىپبيدى كۆەست ويىندار ارقىلى يگەرتۋ»، «جازۋ داعدىسىن قالىپتاستىرۋدىڭ وڭتايلى تاسىلدەرى» جانە «Learning apps، apps Geyser پلاتفورمالارىندا جانە ەلەكتروندى وقۋلىق كومەگىمەن جاڭا ءالىپبيدى ۇيرەتۋدىڭ تاسىلدەرى» اتتى مودۋلدەردى مەڭگەرەدى.
«لاتىن گرافيكاسىن قابىلداپ بولعاننان كەيىن ونى وقىتۋ ماسەلەسى ءبىرىنشى كەزەككە قويىلدى. قىزدار ۋنيۆەرسيتەتىنىڭ پەداگوگيكالىق جوعارعى وقۋ ورنى ەكەندىگىن ەسكەرە وتىرىپ، ءوز تاراپىمىزدان بيىلعى وقۋ جىلىنان باستاپ جاڭا ءالىپبيدى ۇيرەتەتىن مامانداردى جانە بالاباقشا مەن ورتا مەكتەپتەرگە ارنالعان وقۋلىقتاردى دايىنداۋ كوزدەلىپ وتىر. ەلىمىز بويىنشا لاتىن الىپبيىنە ءوتۋ ءبىلىم جانە عىلىم مينيسترلىگىنىڭ ءبىلىم بەرۋدىڭ بارلىق دەڭگەيىندە 2025 جىلعا دەيىن قازاق ءتىلى ءالىپبيىن لاتىن گرافيكاسىنا كوشىرۋ كەستەسىن بەكىتۋ تۋرالى بۇيرىعى بويىنشا مەكتەپتىڭ ءبىرىنشى سىنىبى جاڭا ءالىپبي بويىنشا 2020 جىلدان باستاپ وقىتىلماق. وسىعان وراي اشىلعان كۋرسقا الماتى قالاسى مەن الماتى وبلىسىنىڭ مەكتەپ مۇعالىمدەرى مەن بالاباقشا تاربيەشىلەرى، مەكتەپالدى دايارلىق توپتارىنىڭ تاربيەشى-مۇعالىمدەرى قاتىسۋدا»، – دەيدى ستراتەگيالىق دامۋ جانە حالىقارالىق بايلانىستار جونىندەگى پرورەكتور الماگۇل قۇلتۋمانوۆا.
ونىڭ ايتۋىنشا، بىرنەشە كۇنگە سوزىلعان كۋرس بارىسىندا قاتىسۋشىلار لاتىن گرافيكاسىنا نەگىزدەلگەن قازاق الىپبيىمەن وقىپ، ونىڭ نەگىزگى وزەكتى ماسەلەلەرىمەن تانىستى.
كۋرس ۋنيۆەرسيتەت عالىمدارى قۇراستىرعان «لاتىن گرافيكاسىنا وتۋگە بايلانىستى ينتەراكتيۆتى ۇيرەتۋشى باعدارلامالار جاساۋدىڭ لينگۆيستيكالىق نەگىزدەرى مەن مۋلتيمەديالىق تەحنولوگيالارى» اتتى ارنايى باعدارلاما بويىنشا جۇرگىزىلدى. اتالعان جوبانىڭ باعدارلاماسىندا Android، iOS، Windows پلاتفورماسىنداعى لينگۆيستيكالىق سوزدىك، لاتىن ارپىنە اۆتوماتتى تۇردە اۋدارما جاسايتىن ارنايى سايت پەن دىبىس جانە بەينە ماتەريالدارىمەن سۇيەمەلدەنگەن ساندىق ەلەكتروندى وقۋلاقتار بار. سونىمەن قاتار، لاتىن گرافيكاسىن ۇيرەتۋ ءۇشىن بالالارعا ارنالعان ويىن باعدارلامالارى مەن ءموبيلدى قوسىمشالار ەنگىزىلگەن.
العاش رەت ۇيىمداستىرىلىپ وتىرعان كۋرستى فيلولوگيا عىلىمدارىنىڭ دوكتورى، پروفەسسور ت. ەرمەكوۆا، تەحنيكا عىلىمدارىنىڭ كانديداتى، دوسەنت گ. سالعارايەۆا، فيلولوگيا عىلىمدارىنىڭ كانديداتى س. ودانوۆا، فيلولوگيا عىلىمدارىنىڭ كانديداتى ع. شويبەكوۆا، PhD ن. جاڭابايەۆا جانە عىلىم ماگيسترى ج. بازايەۆا وتكىزدى.
«جاڭا زاماننىڭ جاستارى وزگەرمەلى ۋاقىتتا ءومىر سۇرۋگە قابىلەتتى بولىپ قانا قويماي، وقيعالار مەن ۇدەرىستەردىڭ ورتاسىندا، كوش باسىندا بولۋى ءتيىس. بۇل تەرەڭ تۇيسىنە بىلگەنگە باسەكەلەستىككە اپارار جولدىڭ باسى، ۇلتتىق كودىمىزدى كوزدىڭ قاراشىعىنداي ساقتاۋدىڭ نەگىزى. قازىرگى مەملەكەتىمىزگە ۇلتتى ۇيىستىرا الاتىن، تىڭ باعىتتاعى رۋحاني اعىم كەرەك. لاتىن ءارىپىن ەنگىزۋدىڭ باستى وزەگى دە وسىندا جاتىر. سوندىقتان دا جاڭا ءالىپبي ەلىمىز ءۇشىن قاجەتتى، ۋاقىت تالابىنان تۋىنداپ وتىرعان جاڭا اتريبۋت، اسا ماڭىزدى فاكتور دەپ سانايمىز. بۇل تۇرعىدا وسى تاقىلەتتەس كۋرستار جاڭا ءالىپبيدى ۇيرەتۋدە ۇلكەن سەپتىگىن تيگىزبەك»، – دەپ اتاپ ءوتتى قىزدار ۋنيۆەرسيتەتى باسپا ءسوز جانە قوعاممەن بايلانىس ءبولىمىنىڭ باسشىسى جاندار اسان.
