حالىقتى تۇرعىن ۇيمەن قامتۋدىڭ پرەزيدەنت ۇسىنعان جاڭا باعدارلاماسىنا الماتى تۇرعىندارى قالاي قاتىسىپ جاتىر؟ 

قازاقستان پرەزيدەنتى نۇرسۇلتان نازاربايەۆ 2018 جىلدىڭ 5 ناۋرىزىندا قازاقستان حالقىنا “پرەزيدەنتتىڭ بەس الەۋمەتتىك باستاماسى” اتتى ۇندەۋىن جولداعان ەدى. العاشقى باستاما – ءاربىر وتباسىعا باسپانا الۋدىڭ جاڭا مۇمكىندىكتەرىن بەرۋ.

وسى ماقساتتا “7-20-25” تۇرعىن ءۇي باعدارلاماسى ۇسىنىلدى. بۇل باعدارلاما بويىنشا يپوتەكالىق نەسيەنىڭ جىلدىق مولشەرلەمەسى 7%-تەن اسپايتىن، باستاپقى جارناسى 20%-كە دەيىن جانە نەسيە وتەۋ مەرزىمى 25 جىلعا دەيىن بولادى.

اۋماقتىق مەملەكەتتىك ورگانداردىڭ مالىمەتىنشە، قازىرگى كەزدە “قازاقستاننىڭ تۇرعىن ءۇي قۇرىلىس جيناق بانكىنىڭ” الماتىداعى بولىمشەلەرىندە وسى باعدارلاماعا قاتىسۋعا ءوتىنىش بەرۋگە كەلەتىن ازاماتتاردىڭ قاتارى بىرنەشە ەسە وسكەن. سول سەبەپتى ۇزىن-سونار كەزەك ازايار ەمەس.

باعدارلاما ىسكە قوسىلعالى بەرى بانكتىڭ الماتىداعى بولىمشەلەرى كۇنىنە 1500-دەن استام كليەنتتى قابىلدايدى. بۇل جاعىنان الماتى ەلىمىزدىڭ وزگە وڭىرلەرىنەن الدا.

الماتىدا وسى باعدارلاما بويىنشا كەڭەس بەرەتىن جانە قۇجات قابىلدايتىن 8 ءموبيلدى توپ قۇرىلعان. بايلانىس تەلەفوندارى: 8 701 186 73 34، 8 777 188 20 88. بانك سايتى ارقىلى كەڭەسشىلەرگە حابارلاسۋعا بولادى. “7-20-25” يپوتەكالىق باعدارلاماسى بويىنشا قۇرىلعان ءموبيلدى توپتار دا ازىرشە تەك الماتىدا جۇمىس ىستەيدى.

جاڭا تۇرعىن ءۇي باعدارلاماسىنا “سەنتركرەديت بانكى”، “حالىق بانكى”، “ەۋرازيا بانكى”، “اتفبانك”، Bank RBK پەن “سەسنابانك” تا سەرىكتەس ەكەنىن ايتا كەتەيىك.

بۇعان قوسا، “7-20-25” جانە “نۇرلى جەر” باعدارلامالارى بويىنشا اقپاراتتى ق ر ينۆەستيسيالار جانە دامۋ مينيسترلىگىنىڭ قۇرىلىس جانە تۇرعىن ۇي-كوممۋنالدىق شارۋاشىلىق ىستەر كوميتەتى رەسمي سايتىنان، “ەلەكتروندى ۇكىمەت” پورتالىنان، ق ر ۇلتتىق بانكى رەسمي سايتىنان جانە بۇقارالىق اقپارات قۇرالدارىنىڭ سوڭعى ماتەريالدارىنان تابۋعا بولادى.

ەسكە سالا كەتەيىك، بۇعان دەيىن “7-20-25” باعدارلاماسى بويىنشا العاشقى جەتى يپوتەكا 4 شىلدەدە الماتى، استانا، اقتاۋ، ورال جانە وسكەمەن قالالارىندا بەرىلگەنىن حابارلاعان ەدىك.