حورۆاتيا پرەزيدەنتى كوليندا گرابار-كيتاروۆيچتى رەسەيدە وتكەن فۋتبولدان الەم چەمپيوناتىنان كەيىن بۇكىل الەم تانىدى. جاي عانا تانىپ قويمادى، تامساندى، عاشىق بولدى، قىزىعا دا، قىزعانا دا قارادى. ارينە، ءوز ەلىنىڭ كومانداسىن قولداۋ ءۇشىن قاراپايىم جولاۋشىلارمەن بىرگە رەسەيگە ۇشىپ بارعان مەملەكەت باسشىسىن كىم قۇرمەتتەمەس؟ ءبىزدىڭ ەندىگى اڭگىمەمىز جۇرت سۇيسىنگەن پرەزيدەنتتىڭ بالالىق شاعى، ارماندارى، جالپى ءومىرى جايلى بولماق.

شەتەلدىك دەرەككوزدەرگە سەنسەك، كوليندا ريەكا قالاسىندا تۋعان ەكەن، الايدا بالالىق شاعىن تۋعان قالاسىنا جاقىن اۋىلدا وتكىزگەن. وتباسىنىڭ قىستاعى مەن ەت دۇڭگىرشەگى بولىپتى.

كوليندا بالا كۇنىندە ستيۋاردەسسا بولۋدى ارمانداعان. قىزدارىنىڭ بورت سەرىگى بولامىن دەگەن  نيەتىن اتا-اناسى دا قولدادى. الايدا لايىقتى ءبىلىم الۋىن تالاپ ەتتى. 17 جاسىندا كوليندا اقش-قا وقۋعا اتتانادى، كەيىن زاگرەب ۋنيۆەرسيتەتىنە وقۋعا تۇسەدى.

پرەزيدەنتتىك سايلاۋعا قاتىسپاستان بۇرىن پارلامەنتتە جۇمىس ىستەدى، سىرتقى ىستەر ءمينيسترى بولدى ءارى حورۆاتيانىڭ اقش-تاعى ەلشىسى قىزمەتىن اتقاردى.

46 جاسىندا كوليندا الەم تاريحىنداعى العاشقى ايەل پرەزيدەنت قانا بولىپ قويعان جوق، بۇگىنگى تاريحتاعى  ەڭ جاس مەملەكەت باسشىسى اتاندى.

«حورۆاتيانىڭ گۇلدەنەتىنىنە ەشكىم كۇماندانبايتىن بولادى»

گرابار-كيتاروۆيچتىڭ مەملەكەت باسشىسى لاۋازىمىنداعى العاشقى فرازاسى وسى بولدى.

كوليندا ەل باسقارىپ وتىرعان پرەزيدەنت قانا ەمەس، ەكى بالانىڭ اناسى. كىشى ۇلىنىڭ اتى – لۋكا، ال قىزى – كاتارينا.

17 جاسىندا كوليندا مانەرلەپ سىرعاناۋدان يۋنيورلار اراسىندا چەمپيون بولدى.

ول اعىلشىن، يسپان جانە پورتۋگال تىلدەرىندە ەركىن سويلەيدى. يتاليان، فرانسۋز، نەمىس تىلدەرىن دە ازداپ مەڭگەرگەن.

2017 جىلى Forbes جۋرنالىنىڭ دەرەگى بويىنشا، گرابار-كيتاروۆيچ الەمدەگى ەڭ لاۋازىمدى ايەلدەردىڭ كوشىن باستادى.

مىناداي ءبىر قىزىقتى دەرەكتەر كەزدەسەدى. ءار ەلدىڭ باسشىلارىمەن كەزدەسۋ بارىسىندا كوليندا حورۆاتيا فۋتبول كلۋبىنىڭ فۋتبولكاسىن سىيعا تارتادى.

ال حورۆاتتاردىڭ ءوزى كوليندانى حالىق پرەزيدەنتى دەپ سانايدى. نەگە دەسەڭىزدەر، ول تۇرعىندارمەن اسحانالاردا قاراپايىم تاماقتاردى جەي بەرەدى.

قوعامدىق كولىكتەرمەن ءجيى جۇرەدى. ازىق-تۇلىك الۋ ءۇشىن بازارعا ءوزى بارادى.

بارىمىزگە بەلگىلى، الەم چەمپيوناتىنا پرەزيدەنت قاراپايىم جولاۋشىلار ۇشاعىمەن بارعان بولاتىن. كومانداسىن قولداۋ ءۇشىن ۇلتتىق سيمۆولدى فۋتبولكا كيىپ، جانكۇيەرلەرىمەن بىرگە وتىرىپ، چەمپيوناتتى تاماشالادى.

ءتىپتى ۆيپ-ايماقتا دا ۇستىنەن ۇلتتىق فۋتبولكاسىن شەشپەدى.

حورۆاتيا قۇراماسى چەمپيون بولا الماسا دا، پرەزيدەنت كوماندانىڭ ءار ويىنشىسىنا جەكە-جەكە العىس ايتىپ شىققان.

مىنە، ناعىز حالىق باسشىسى وسىنداي بولسا كەرەك-تى. قايران قالاسىڭ، تامساناسىڭ، سۇيسىنەسىڭ...