الماتىداعى ەسكى ۇيلەردى ءسۇرۋ جوسپارلى تۇردە جالعاسادى. قالا اكىمى باۋىرجان بايبەك، توزىعى جەتكەن باسپانالار باعدارلاماسى مەن اۋلالاردى اباتتاندىرۋ، سونداي-اق، قالانىڭ ءبىرقاتار داڭعىلدارىن جاڭارتۋ بارىسىمەن تانىستى. جاقىن ارادا سۇلەيمەنوۆ پەن جاندوسوۆ كوشەسىنىڭ قيىلىسىندا ورنالاسقان 50ء-شى جىلداردا سالىنعان ۇيلەردى ءسۇرۋ جۇمىستارى باستالماق. ال ول ۇيلەردەگى تۇرعىندارعا ۋاقىتشا پانالايتىن پاتەر بەرىلمەك. سول ارالىقتا ءدال سول اۋماققا جاڭا كوپقاباتتى تۇرعىن ءۇي سالىنادى. باس-اياعى توزىعى جەتكەن 44  ءۇي سۇرىلەتىن بولادى. وعان قوسا، رايىمبەك داڭعىلى بويىنداعى 2،7 گا جەرگە ورنالاسقان ەكى قاباتتى اپاتتى ءۇي دە سۇرىلەدى. جالپى، الداعى جىلدارى ەسكى جانە اپاتتى جاعدايداعى 500 ءۇي بۇزىلىپ، ولاردىڭ ورنىنا 1،2 ملن. شارشى مەتر اۋماقتى قامتيتىن  باسپانالار بوي كوتەرمەك. 

«ەسكى ۇيلەردى ءسۇرۋ جۇمىسى بارىنە دە پايدالى بولماق. جۇمىس ورىندارى اشىلادى، ولاردان سالىق تولەنەدى، تەحنيكالار جۇمىس ىستەيتىن بولادى، سىزدەرگە دە جاقسى. ءبارى دە زاڭ اياسىندا اتقارىلادى. ءار ادامنىڭ جاعدايى ەسكەرىلەتىن بولسىن. ءبىر جىل شىداساڭىزدار بولدى»، – دەدى الماتى قالاسىنىڭ اكىمى باۋىرجان بايبەك تۇرعىندارمەن كەزدەسۋ بارىسىندا. 

جۇمىس ساپارى بارىسىندا قالا اكىمى اۋەزوۆ اۋدانىنداعى جاڭارعان اۋلالاردى كوردى. وندا بيىل 65 اۋلا جوندەلگەن ەدى. بىلتىر قالادا 500 اۋلا جاسالسا، وسى جىلى تاعى دا 600 اۋلا جاڭارماق. اۋلا كەلبەتىن وزگەرتۋ بارىسىندا بالالار جانە سپورت الاڭدارى، ترەناجەر جانە ويىن كەشەندەرى پايدالانۋعا بەرىلەدى.  ولاردىڭ ەدەندەرىنە اسفالت جانە رەزينا توسەلىپ، ورىندىقتار مەن قوقىس جاشىكتەرى قويىلادى. شاھار باسشىسى قالانىڭ تاريحي ورتالىعىن جاڭارتۋعا قاتىستى ءجۇرىپ جاتقان قۇرىلىس جۇمىستارىنىڭ قارقىنىن دا نازاردان تىس قالدىرمادى. بۇگىندە اباي، ابىلاي حان، نازاربايەۆ داڭعىلدارى مەن اباي  الاڭىنداعى ينجەنەرلىك جەلىلەردى قايتا جۇرگىزۋ جۇمىستارى قولعا الىنۋدا. وندا تاس توسەۋ، جارىق باعانالارىن، سۋارۋ جۇيەلەرىن اۋىستىرۋ، كىرە بەرىستەر مەن نىساننىڭ سىرتقى كەلبەتىن وزگەرتۋ جۇمىستارى قىزا تۇسكەن. قايتا جوندەۋ بارىسىندا جۇرگىنشى ايماعى كەڭەيەدى، كولەڭكەلى كەڭىستىككە جاسىل جەلەك وتىرعىزىلىپ، سۋ جاڭا سۋبۇرقاقتار سالىنىپ، كەيبىرى قايتا جاڭارتىلادى.