الماتىدا وتكەن ءداستۇرلى الپينياداعا بيىل 5000-نان استام ادام قاتىستى. تەڭىز دەڭگەيىنەن 4 مىڭ 376 مەتر بيىكتىكتە ورنالاسقان «نۇرسۇلتان شىڭىن» 200-دەن استام ادام باعىندىردى. وسى جىلى بۇقارالىق سپورتتىق شارا استانانىڭ 20 جىلدىعىنا ارنالدى.  

ءداستۇرلى الپينياداعا قاتىسۋشىلار سانى جىلداعىداي كوپ. ءتىپتى، جول بويىندا ۇزىن-سونار كەزەك تە پايدا بولدى. شىمبۇلاق اسپالى جولى دەمالىس كۇنى تەگىن قىزمەت كورسەتتى. قاتىسۋشىلار ەڭ الدىمەن مەدەۋ-شىمبۇلاق-تالعار اسۋى مەن بوگدانوۆيچ مۇزدىعىن باعىندىرسا، كەيىن قازاقستان حالقى اسسامبلەياسى شىڭىنا اياق ىلىكتىردى، ال نەگىزگى نۇكتە نۇرسۇلتان شىڭى بولدى.

«نۇرسۇلتان شىڭى» 4376 مەتر بيىكتىكتە ورنالاسقان. وعان كوتەرىلۋ ءۇشىن الپينيستەر تاڭعى ساعات 5-تەن باستاپ جولعا اتتاندى. الپينياداعا جاس پەن جاسامىس تا، كاسىبي الپينيست پەن اۋەسقوي سپورتشىلار دا قاتىستى. اراسىندا تالاي جىلدان بەرى ۇزبەي كەلىپ جۇرگەندەرى دە بار.

«مەن تاۋعا 1956 جىلدان بەرى تۇراقتى تۇردە شىعامىن. 81 جاستامىن، دەنساۋلىعىمنىڭ جاقسى بولۋىنا وسىلاي الپينيزممەن شۇعىلدانۋ اسەر ەتتى دەپ سانايمىن. سوندىقتان بارلىق ازاماتتاردى سالاۋاتتى ءومىر سالتىن ساقتاۋعا شاقىرامىن»، – دەيدى ۆالەنتينا لەريكوۆا.

«الپينيادا – ول تەك بۇقارالىق سپورتتى ناسيحاتتاۋ عانا ەمەس، ول ءالپينيزمدى دامىتۋ. ماسەلەن، مۇنداي شاراعا قاتىسقان 1000 ادامنان، كەم دەگەندە 3 ادام الپينيزمگە قىزىعۋشىلىق تانىتىپ، ۇيىرمەگە كەلسە، سونىڭ ءوزى جەتىستىك. ءبىز ءۇشىن باستىسى، حالىقتى تاۋعا شىعۋعا باۋلۋ»، – دەدى الپينيست ماقسۇت جۇمايەۆ.

جالپى، بۇقارالىق شاراعا بيىل 5 مىڭنان استام ازامات تىركەلگەن. سونىڭ ىشىندە، «نۇرسۇلتان شىڭىن» 200-دەن استام سپورتشى باعىندىردى. قاۋىپسىزدىك جاعىنا باسا ءمان بەرىلگەن. تاۋعا شىعۋ باعىتى بويىندا توتەنشە جاعدايلار كوميتەتىنىڭ كەزەكشى-قۇتقارۋشىلارى، اپات مەديسيناسى ورتالىعىنىڭ شاتىرلى پۋنكتتەرى جۇمىس ىستەدى. ودان بولەك، ارنايى تىكۇشاقتار دا قاراستىرىلدى.

«بۇل ءىس-شارا دەگەن 1995 جىلى كومسومول شىڭى دەپ اتالاتىن بولاتىن. 1998 جىلى «نۇرسۇلتان شىڭى» دەگەن اتقا يە بولدى. سول 1995 جىلدان بەرى ءوتىپ كەلە جاتىر. الدىڭعى جىلى شىڭنىڭ جوعارعى جەرىنە دەيىن جەتكەندەر سانى 293 بولدى»، – دەدى الماتى قالاسى دەنە شىنىقتىرۋ جانە سپورت باسقارماسى ءبولىمىنىڭ باس مامانى اسحات ماقسۇتوۆ.

بيىلعى الپينيادا استانانىڭ 20 جىلدىعىنا ارنالدى. وسى جىلدان باستاپ فيزكۋلتۋرنيك شىڭى قازاقستان حالقى اسسامبلەياسى شىڭى دەپ وزگەرتىلدى. ول تەڭىز دەڭگەيىنەن 4068 مەتر بيىكتىكتە ورنالاسقان.