بۇگىن ەل جۇرەگى، قازاقستاننىڭ قۋاتى اتانعان باس قالا – استانانىڭ تۋعان كۇنىن بۇكىل رەسپۋبليكا تويلاپ جاتىر. ال وسى ساتتە الماتىداعى «استانا» الاڭىندا ۇلان-اسىر توي جالعاسۋدا.

مەرەكەلىك دۋماندى كونسەرتتىڭ باستالۋىنا ءالى ءبىر ساعات بار. دەگەنمەن، تاۋەلسىزدىگىمىزدىڭ التىن بەسىگى استانانى شىن جاقسى كورەتىن الماتىلىقتار بەلگىلەنگەن ۋاقىتىنان بۇرىن جينالىپ جاتىر. ويتكەنى، ساۋلەتى مەن داۋلەتى كەلىسكەن باعانالى باس وردامىز بيىل 20 جاسقا تولدى. جالپى، وزدەرىڭىز بىلەسىزدەر، الماتى جىلدا بۇل مەيرامدى ەرەكشە اتاپ وتەدى. مەرەيى ۇستەم باس قالاعا بارلىق ءان دە، بي دە، ىستىق لەبىز دە ارنالادى. ويتكەنى، استانانىڭ كوركى كوپتى شابىتتاندىرادى. بۇگىن «استانا» الاڭىندا اتى ەلگە تانىمال وتاندىق جۇلدىزدار ونەر كورسەتەدى. ولاردىڭ قاتارىندا جاس تا، جاسامىس تا ءسۇيىپ تىڭدايتىن ەربولات قۇدايبەرگەنوۆ، كەنتال، ديانا شاراپوۆا سىندى انشىلەر بار. سونداي-اق، كەشكى ساعات 20:00-دە باستالاتىن شارادا 60-تان استام ءبيشى تەاترلاندىرىلعان «نۇر استانا» قويىلىمىن قويادى. باسىنان باعى تايماعان استاناعا شەتەلدىكتەر تامسانادى، ال تۇرعىلىقتى حالقى ەشقايدا كوشپەستەي بولعان. ال ەلىمىزدىڭ باسقا قالالارى ەلىمىزدىڭ تىرەگىن ەرەكشە ماقتان تۇتادى.

استانانىڭ تۋعان كۇنىن تويلاۋ ءبىر كۇنمەن شەكتەلمەيدى. تاعى ايتا كەتەيىن، جىبەك جولى جانە پانفيلوۆ كوشەلەرىندە مەرەكەلىك دەمالىس كۇندەرى «الاتاۋ» ءداستۇرلى ونەر تەاترىنىڭ قويىلىمدارى ، «قۇراق كورپە» تىگۋدەن شەبەرلىك سىنىپتارى، جاستاردىڭ Art party، استانانىڭ 20 جىلدىعىنا  ارنالعان سپەكتاكلدەر مەن جاستار كونسەرتتەرى بولادى. ودان بولەك، 8-شىلدە كۇنى مەرەيتويلىق ۆەلوجارىس پەن «شىمبۇلاق-نۇرسۇلتان شىڭى» الپينياداسى ۇيىمداستىرىلادى. ال، بۇگىنگى مەرەكەلىك شارا ساعات 22:00-دە ادەتتەگىدەي وتشاشۋمەن اياقتالادى. قىزىقتىڭ ءبارىن ءوزىڭىز "استانا" الاڭىنا كەلىپ كورۋگە مۇمكىندىكتەرىڭىز بار.