الماتىدا استانانىڭ قۇرداستارى ماراپاتتالدى. ەلوردانىڭ 20 جىلدىعىن تويلاعان سالتاناتتى شارادا اكىمدەر اننەن شاشۋ شاشتى. ارنايى اۆتوشەرۋ ءوتىپ، قايىرىمدىلىقتان تۇسكەن قارجى مۇقتاج بالالارعا بەرىلدى.

وسىدان 20 جىل بۇرىن، 6-شىلدە كۇنى ىڭگالاپ دۇنيە ەسىگىن اشقان قىزدىڭ ءبىرى – الينا. بۇگىندە ديزاينەر ماماندىعى بويىنشا وقىپ جاتقان 2-كۋرستىڭ ستۋدەنتى  «قازىرگى جاستار جاڭا تەحنولوگيا، عىلىمعا قۇشتار، جاڭاشىلدىققا اۋەس» - دەيدى. جەتىسۋ اۋدانىنداعى ەكى ءجۇز مىڭداي حالىقتىڭ ىشىنەن تۋعان كۇندەرى ءتول مەرەكەمەن سايكەس كەلگەن قوس قىزعا اۋدان اكىمى پلانشەت سىيلادى.

«1998 جىلى 6-شىلدە استانامەن بىرگە دۇنيە ەسىگىن اشقانبىز. جالپى ەلىمىز كوركەيىپ جاتىر. ءتاي-تاي باسىپ جاتىر. استانانى تۋعان كۇنىمەن شىن جۇرەكتەن قۇتتىقتايمىن جانە گۇلنۇر سەنى دە قۇتتىقتايمىن»، – دەيدى الينا سەيىت قىزى. 

«ەلباسىمەن بىرگە ءبىر كۇندە تۋعانىما وتە قاتتى قۋانىشتىمىن جانە مەنى وسى كۇنى دۇنيەگە اكەلگەن اناما مىڭ دا ءبىر العىس ايتامىن. استانا كۇنى قۇتتى بولسىن! قازىرگى جاستار كىشكەنتاي كەزىنەن باستاپ اقىلدىراق جانە دە تەحنولوگياعا جاقىنىراق دەپ ويلايمىن»، – دەيدى گۇلنۇر عالىمجان قىزى. 

جەتىسۋ اۋدانىندا شاعىن كاسىپپەن اينالىساتىن ادام كوپ. 10 مىڭنان استام شاعىن كاسىپ، 44 ءىرى ءوندىرىس ورىندارى تىركەلگەن. ەل ەكونوميكاسىنىڭ وسۋىنە وزىندىك ۇلەس قوسقان بيزنەس وكىلدەرى دە بۇگىنگى سالتاناتتى شارادا استانانىڭ 20 جىلدىق توسبەلگىسىمەن ماراپاتتالدى. 

«قازاقتىڭ ۇلتتىق ويىندارى، ارقان تارتۋ تاعى باسقالار وسىندا ءبىزدىڭ تەرريتوريامىزدا بولىپ جاتىر. مەندە ءوزىم «اتامەكەن» ءانىمدى ارنادىم. قۇرمەتتى جەتىسۋ اۋدانىنىڭ تۇرعىندارى، الماتىلىقتار، وتانداستار بارشاڭىزدى شىن جۇرەكتەن قۇتتىقتايمىن! وسى استانانىڭ 20 جىلدىعى بارشاڭىزعا قۇتتى بولسىن! جۇرتىمىز تىنىش، ەلىمىز امان بولعاي»، – دەدى الماتى قالاسى جەتىسۋ اۋدانى اكىمىنىڭ ورىنباسارى ۆياچەسلاۆ ۆاۆيلين.

ۇزاق ءومىر سالتىن ساباقتاستىرعىسى كەلگەن قاريالار ساياباقتا ساپ تۇزەپ، جاتتىعۋلار جاساسا، جالاۋلاتقان  اۆتوشەرۋ دە  اۋدان حالقىنىڭ كوڭىلىن كوتەردى. كولىك شەرۋىنەن تۇسكەن قارجى مۇقتاج بالالارعا بەرىلەدى.