سوڭعى ەكى جىلدا الماتى اۋرۋحانالارىن قارجىلاندىرۋ 60 پايىزعا ارتقان. ءنومىرى 4ء-شى كلينيكالىق اۋرۋحانانىڭ  جۇمىسىمەن تانىسقان قالا اكىمى باۋىرجان بايبەك وسىنى مالىمدەدى. قالا اكىمى ەم ىزدەپ كەلگەن تۇرعىندارمەن دە تىلدەسىپ، اق حالاتتىلارعا دياگنوزدى بارىنشا ۋاقتىلى ءارى ءدال انىقتاۋدى تاپسىردى. ءىس-ساپاردان سوڭ سالتاناتتى شاراعا قاتىسقان قالا جەتەكشىسى ەلباسىنىڭ جارلىعىمەن  بىلىكتى دارىگەرلەرگە توسبەلگىلەر تابىستادى.    

كوپ سالالى مەديسينالىق قىزمەت كورسەتىن №4 كلينيكالىق  اۋرۋحانا شۇعىل وتا جاساۋ جاعىنان جۇرتقا تانىمال. حالىققا قاۋىرت قىزمەت كورسەتۋدەن بوسامايتىن قابىلداۋ بولىمىندە Emergency room، ياعني شۇعىل قىزمەت بولمەسى اشىلدى. جاڭا جوبا قابىلداۋ بولىمىنە تۇسكەن بارلىق ناۋقاستاردى بىلىكتى دارىگەرلەردىڭ ءبىر ساتتە كورىپ، قاراۋىنا مۇمكىندىك بەرەدى.

اۋرۋحانا «كوپسالالى ساراپتاما» ءادىسى، «ناۋقاستاردى بريگادالىق باسقارۋ»،  «ءبىر تەرەزە» ەرەجەلەرى سىندى جاڭاشا ۇستانىمدار ارقىلى جۇمىس ىستەيدى. ورتالىقتاندىرىلعان وتتەگى جەتكىزىلىمىمەن 3 توسەككە ارنالعان جانساقتاۋ كامەراسى ءموبيلدى جابدىقپەن جابدىقتالعان.

وزگەنىڭ ومىرىنە اراشاشى، قينالعاننىڭ قاسىنان تابىلاتىن جاناشىر جاننىڭ ءبىرى  توعجان ساعىنىش قىزى. قول استىنداعى ءۇش جۇزدەي مامان جۇمىس ىستەيتىن ءنومىرى 2ء-شى  قالالىق ەمحانانىڭ باسشىسىنا اۋدانداعى 65 مىڭنان استام ادامعا تۇراقتى قىزمەت كورسەتۋ مىندەتتەلگەن. بىلىكتى دارىگەرگە قالا اكىمى ەلباسىنىڭ جارلىعىمەن  شىققان «استانانىڭ 20 جىلدىعى» توسبەلگىسىن تابىستادى.  

«استانانىڭ 20 جىلدىق مەدالىمەن ماراپاتتالىپ جاتىرمىن. ول مەن ءۇشىن ۇلكەن دارەجە، سىي. مىنەكي ەلىمىز كوركەيىپ جاتىر. بىزدەر دارىگەرلەر سول تەك حالىققا ەڭبەك ەتىپ، سول حالىقتىڭ تەك قانا دەنساۋلىعى جاقسى بولسا ەكەن دەيمىز. ءبىزدىڭ حالقىمىزدىڭ سانا سەزىمى وتە جوعارى. وسىدان ەندى 15 جىل بۇرىن اسقىنعان تۇرىندە كەلىپ جاتسا، ال ەندى قازىرگى جاعدايدا حالىق ءوزى كەلەدى»، – دەدى الماتى قالاسى №2 قالالىق ەمحانانىڭ باس دارىگەرى توعجان ەسبەرگەنوۆا.  

الماتى قالاسىندا 25 مىڭنان استام دارىگەر جۇمىس ىستەيدى. مەديسينا ماماندارىن مەملەكەتتىك مەدالدارمەن ماراپاتتاعان قالا باسشىسى دارىگەرلەرگە اۋىرعان جاننىڭ دياگنوزىن ءدال تابۋ ماڭىزدى ەكەنىن، جانى جابىرقاڭقى جاندى جىلى سوزبەن قارسى الۋدى قاپەرگە سالدى.

«ادام ءبىر جاڭاشىلدىق اكەلەم  دەسە، وزگەرتەم  دەسە  كوپشىلىك ونى كەيبىر كەزدە تۇسىنبەيدى. ءبىراق سىزدەر سياقتى ادام قىزمەتكە كەلسە، مىسالى وپەراسيانىڭ وزىندە جاۋاپكەرشىلىك الۋ كەرەك. مۇمكىندىگىنشە ەندى جىلى سوزبەن قارسى الىپ، ادامعا ولدا ءدارى عوي كەيبىر جىلى ءسوز. جۇمىستارىڭىز سول سەبەپتەن وتە قيىن. وزدەرىڭىزگە دەنساۋلىق تىلەيمىن. تابىس تىلەيمىن»، - دەدى الماتى قالاسىنىڭ اكىمى  باۋىرجان بايبەك.  

الماتى عىلىم ورداسى بولعاندىقتان، ەلدىڭ ءار وڭىرىنەن ەمدەلۋگە كەلگەن حالىق قاشاندا كوپ. تەك سوڭعى ۋاقىتتا ەكى مىڭنان استام شەتەلدىك شيپا ىزدەپ كەلگەن. مەديسينالىق مۇمكىندىكتى جاقسارتۋ ماقساتىندا تەك قالا بيۋدجەتىنەن تاعى 95 ميلليارد تەڭگە بولىنبەك.