الماتىدا ەلىمىزدىڭ جۇرەگى استانانىڭ دامۋىنا ۇلەس قوسقاندار ماراپاتتالدى. قالا اكىمى باۋىرجان بايبەك ايانباي ەڭبەك ەتىپ، ەلوردانى گۇلدەندىرۋگە بەلسەنە ات سالىسقاندارعا مەرەيتويلىق مەدالدار تابىستادى. باس قالانىڭ 20 جىلدىق مەرەيلى مەزەتى قارساڭىندا ءتۇرلى سالاداعى جاندار ماراپاتقا يە بولدى. جينالعان الماتىلىقتار استانا مەرەكەسى بارشا حالىق بىرگە اتاپ وتەتىن ۇلى مەيرام دەدى. سەبەبى، بۇل تۇتاس ەلدىڭ قۋانىشى.

بۇل ەلوردانىڭ ەڭسەسىن تىكتەپ، دامۋىنا ۇلەس قوسقانداردىڭ ەڭبەگى ەلەنگەن تاريحي كۇن. بۇگىن استانانى دامىتۋعا ۇلەس قوسقان 270-تەن اسا الماتىلىق پرەزيدەنت جارلىعىمەن مەرەيتويلىق مەدالدارعا يە بولدى. ويتكەنى، ولار ەلىمىز تاۋەلسىزدىك العاننان بەرى تىنباي ەڭبەك ەتىپ، ەل ابىرويىن اسقاقتاتىپ، مەرەيىن اسىرعاندار. ونىڭ قاتارىندا ەڭبەك سىڭىرگەن قوعام قايراتكەرلەرى، عىلىم مەن ءبىلىم، ونەر مەن سپورت سالالارىنىڭ مايتالماندارى، مەملەكەتتىك قىزمەتكەرلەر بار. قالا باسشىسى باۋىرجان بايبەك ۇلت ماقتانىشى، باعانالى باستى وردامىزدىڭ 20 جىلدىعىمەن بارشا جۇرتتى قۇتتىقتادى.  

«وتكەن دۇيسەنبىدە مەملەكەت باسشىسى نۇرسۇلتان ءابىش ۇلى نازاربايەۆ بارلىق اكىمدەردى استانادا جيناپ، بۇگىنگى تاۋەلسىزدىگىمىزدىڭ تۇعىرى استانانىڭ 20 جىلدىق مەرەيتويىمەن سىزدەردى قۇتتىقتاۋدى تاپسىردى. ەلباسى «استانا بۇكىل قازاقستاننىڭ جەتىستىگى. ءبىز باس قالانى بۇكىل ەل بولىپ تۇرعىزدىق. 21ء-شى عاسىردا عالامات دۇنيەنى بىرگە جاسادىق. ازامات تاريحىندا مۇنداي قالالار ەشقاشان 20 جىلدىڭ ىشىندە سالىنباعان. ال، ءبىز سالدىق» دەپ اتاپ ءوتتى. ەڭسەلى ەلوردامىزدىڭ تويى بارشامىزعا قۇتتى بولسىن! ەركە ەسىلدىڭ جاعاسىنداعى ايشىقتى استانا تۇعىرلى دا عۇمىرلى، شوقتىعى ءاردايىم بيىك بولسىن!»، - دەدى الماتى قالاسىنىڭ اكىمى باۋىرجان بايبەك.

1998ء-شى جىلدىڭ ماۋسىم ايىندا ەلباسىنىڭ ساليقالى شەشىمىمەن ارقا تورىندە استانا بوي كوتەردى. رەسمي تۇساۋكەسەرى ءوتىپ، تورتكۇل دۇنيەگە تاۋەلسىز قازاقستاننىڭ ەلورداسى تانىستىرىلدى. بۇگىندە باس قالا ساۋلەتى مەن داۋلەتى كەلىسكەن وزىق مەكەن، تاڭعاجايىپ شاھار. ال، دۇنيەجۇزىن بەيبىت كەلىسىمگە شاقىرعان، عالامدىق يگى باستامالاردىڭ كيەلى ورداسى سانالاتىن استانا كوپتەگەن اقىننىڭ جىرىنا، ءانشىنىنىڭ اسەم انىنە ارقاۋ بولعان.

كۇللى الەمگە ەل اتاعىن اسقاقتاتىپ، ماڭداي تەرمەن مەرەيتويلىق مەدالدارعا يە بولعاندار ەڭبەكتەرىن ەلەگەنى ءۇشىن ەلباسىعا شىن العىس ءبىلدىردى.

«مەن ءوزىم تاۋەلسىزدىك العاننان باستاپ، استاناعا كوشكەننەن باستاپ جۇزدەگەن ولەڭ جازىلعان ەدى. 10 شاقتى ءان ولەڭ جازىلعان. سونىڭ ءبىرى وسى وتكەن جىلى تۇساۋكەسەر تويى بولدى. ءبىز قاشاندا اقىن رەتىندە بارعاندا ءاردايىم ولەڭ جازىپ قايتامىز. بارعان سايىن ءبىر ولەڭ جازىپ قايتامىز. ويتكەنى، بارعان سايىن ءبىر وزگەرىس، بارعان سايىن ءبىر دۇنيە، بارعان سايىن ءبىر عاجايىپ»، - دەدى اقىن، قازاقستاننىڭ ەڭبەك سىڭىرگەن قايراتكەرى ءشومىشباي سارييەۆ.

«مەن قيىن كەزەڭدەردە سوۆەت وداعىندا 15 رەسپۋبليكانىڭ ىشىنەن قازاق جاستارىنىڭ اراسىنان جاڭا پالۋان رەتىندە وليمپيادا چەمپيونى بولعانىما وتە ريزامىن. قازىرگى جاستاردا ارمان بار ما؟! ءوزىمىزدىڭ تۋىمىزدى، ءوزىمىز ەگەمەندى ەل، جەكە مەملەكەت بولىپ بارىپ، وليمپيادا ويىندارىنا، الەم بىرىنشىلىكتەرىنە قاتىسا بەرەمىز. ۇلكەن جەڭىلدىك ەمەس پە؟ سونى شىركىن، جاستار تۇسىنسە دەيمىن»، - دەدى وليمپيادا چەمپيونى، قازاقستاننىڭ ەڭبەك ەرى جاقسىلىق ۇشكەمپىروۆ.  

ەل جۇرەگى استانانىڭ 20 جىلدىعىن كۇللى جۇرت ەرتەڭ دۇرىلدەتىپ تويلاتادى. ويتكەنى، بۇل قالا كوپتىڭ تىلەگىمەن تىرەگى قالانعان، ماقتانىشقا اينالعان مەكەن.