الماتى قالاسىندا  جەڭىل رەلستى كولىك جەلىسى مەملەكەتتىك جەكە مەنشىك سەرىكتەستىك قاعيداسى بويىنشا ىسكە قوسىلادى. جوبانىڭ جالپى قۇنى 130 ملرد تەڭگەنى قۇراماق. قازىرگى تاڭدا ەكى دەڭگەيدەگى اشىق بايقاۋعا دايىندىق جۇمىستارى جۇرگىزىلۋدە. جەكە سەرىكتەس موينىندا جوبالاۋ، جول سالۋ، جىلجىمالى قۇرامدى الىپ كەلۋ جانە ونى ىسكە قوسۋ سىندى مىندەتتەمەسى تۇر. قوعامدىق تاسىمالداۋشى كولىك الماتى ارەنا كەشەنى مەن ساياحات اۆتوۆوكزالى ارالىعىندا قاتىنايدى دەپ كۇتىلۋدە. جالپى جەڭىل رەلستى كولىكتىڭ ءۇش قۇرامى بولادى.

«قاي جەردە جۇرەتىن مارشرۋتى بەلگىلەنگەن. 22،7 شاقىرىم بولادى. ول قالانىڭ ورتاسىمەن جۇرەدى. قالانىڭ اكىمى ايتقانى بويىنشا الماتى ارەنا جاقتى سوسىن ساياحاتتى قوسادى دەگەن. سول جوبا 22،7 شاقىرىم. ول تولە بي كوشەسىمەن ءجۇرىپ، پانفيلوۆ كوشەسىمەن تومەن ءتۇسىپ، ماقاتايەۆ كوشەسىمەن بۇرىنعى جەتىسۋ دەگەن الدىنداعى ترامۆاي بولعان جول بويىنشا»،-دەدى الماتى قالاسى جەڭىل رەلستى كولىك باسقارۋ جوباسى بويىنشا اتقارۋشى ديرەكتورى عاني تاجييەۆ.

جوبا بويىنشا كەلىسىمگە 2019 جىلدىڭ مامىر ايىندا قول قويىلادى دەپ كۇتىلۋدە. قۇرىلىس جۇمىستارى 2 جىل جۇرگىزىلەدى دەپ بولجانىپ وتىر.