الماتىلىق وقۋشىلار جاز بويى سۋدا ءجۇزۋدى تەگىن ۇيرەنەدى. ۇيىمداستىرۋشىلار ساپاسى جوعارى دەگەن قالاداعى التى ۇلكەن باسسەيندى تاڭداپ العان. سپورت باسقارماسى قىستاي تاۋ شاڭعىسى مەن كونكي تەبۋدى تەگىن ۇيرەتكەن ەدى. قالالىق اكىمدىكتىڭ قولداۋىمەن ءوتىپ جاتقان شارا تامىز ايىنىڭ سوڭىنا دەيىن جالعاسپاق.

ليۋبوۆ پەن اناستاسيا مالتۋدى بۇرىننان جاقسى كورسەدە، اقىلى تۇردە باسسەينگە بارۋعا اناسىنىڭ قالتاسى كوتەرمەگەن. تەگىن كۋرستىڭ وتەتىنىن ەستىگەن ەگىز قىزدى اناسى العاشقىلاردىڭ ءبىرى بولىپ تىركەپتى.

«ۇيرەنگىم كەلەدى. ويتكەنى ءبىز تەڭىزگە بارعان سايىن قۇتقارۋشىلاردىڭ كومەگى ارقىلى عانا جۇزەم. سوندىقتان ۇيرەنۋ كەرەك ماعاندا»،-دەدى اناستاسيا سيمونەنكو.

«سۋعا ءجۇزىپ ۇيرەنگىمىز كەلەدى. انامىز الىپ كەلدى»،-دەدى ليۋبوۆ سيمونەنكو.

ايدىندا جاتتىقتىرۋشى ارقىلى ءجۇزۋدىڭ ءبىر ايلىق اقىسى الماتىدا كەمىندە 15 مىڭ تەڭگەدەن باستالادى. وسىنى ەسكەرگەن اكىمدىك سپورت كەشەندەرىنە قاتىساتىن وقۋشى سانىنا وراي قارجى ءبولىپتى. 

«ازىرگە ءالى ءجۇزۋ بىلمەيمىز. وسىنداي تەگىن ساباقتاردىڭ بارىنا وتە قۋانىشتىمىز. ەكى ەگىز قىزىمدى بۇرىن باسسەينگە اپارماعام. ءارى جۇمىسسىزبىن. سوندىقتان ساباقتاردىڭ تەگىن بولۋى جانۇيالىق بيۋدجەتىمىزگە دە جاقسى كومەك بولدى. اقىلى بولسا ەكەۋىنە بىردەي تولەۋ قيىن سوعار ەدى»،-دەدى ولگا پولگالوۆا.

باسسەيندە بالىقتاي جۇزگىسى كەلەتىن بالالارعا كوزىلدىرىك، باس كيىم، ساقتىق كەۋدەشەسى سىندى قۇرالدار تەگىن بەرىلەدى. قاتارىنان قوس جاتتىقتىرۋشى  كىشكەنتايلاردى قاداعالاپ، قاۋىپسىزدىگىن قامتاماسىز ەتەدى.

«كەيبىر بالالار سۋعا ويناۋ ءۇشىن كەلەدى. سۋدىڭ ىشىندە وقۋ وڭاي ەمەس. ءجۇزۋدىڭ تەحنيكالارىن تولىق مەڭگەرۋگە ونسىزدا ۋاقىت تىعىز بولعاندىقتان ساباق ءسال اۋىرلاۋ بولادى.  ءبىر ساعاتتا شامامەن وتىز بالاعا دەيىن قاتىسادى»،-دەدى جاتتىقتىرۋشى ۆيكتور رەشەتنياك. 

جازعى دەمالىستا ەكى مىڭ بالانى جۇزۋگە ۇيرەتۋ جوسپارلانعان. قۇلشىنىس تانىتقاندار قاتارى كوپ بولعاندىقتان باسقارما تەك  8 بەن 12 جاس ارالىعىنداعى بالالاردىڭ قاتىسۋىن قۇپتاعان. ءاربىر بالا ءبىر ساعاتتان اپتاسىنا ءۇش مارتە ءجۇزۋ ساباعىنا كەلە الادى. 

«الماتى قالاسى اكىمدىگىنىڭ قولداۋىمەن سپورتتىق الماتى باعدارلاماسىنىڭ اياسىندا وقۋشىلاردى ءجۇزۋ نەگىزدەرىنە ۇيرەتۋ جۇمىستارى جالعاسىن تاۋىپ جاتىر. وسى ءبىر ايدىڭ ىشىندە 702 بالا ءجۇزۋ باعدارلاماسى بويىنشا وقىپ، ۇيرەنىپ ءوتتى»،-دەدى "سپورتتىق الماتى" جوباسىنىڭ ۇيىمداستىرۋشىسى ايدوس باگاشيەۆ.   

12 ساباقتان سوڭ، قاتىسۋشىلار سۋدا دۇرىس دەم الۋ، قالقۋ، مالتۋ، سۇڭگۋ، سەكىرۋ سىندى سان ءتۇرلى ادىستەردى مەڭگەرەدى. باسسەينگە بالاسىن بەرگىسى كەلگەن بۇقارا سپورت باسقارماسىنا الدىن الا تىركەلىپ، ساباققا تۋۋ تۋرالى كۋالىكتىڭ كوشىرمەسىن، مەديسينالىق انىقتاما اكەلەدى. باسسەينگە بارۋ بىتكەن سوڭ ۇيىمداستىرۋشىلار سەرتيفيكات پەن مەدالداردى تابىستاماق.