الماتىدا بارلىق جاياۋ جۇرگىنشى اۋماعى ءبىر اينالىمعا بىرىكتىرىلەدى. بۇل جونىندە الماتى قالاسى ساۋلەت جانە قالا قۇرىلىسى باسقارماسىنىڭ وكىلدەرى ءمالىم ەتتى. 

2019 جىلى تولە بي كوشەسىنىڭ ءبىر بولىگىندە جاياۋ جۇرگىنشى اۋماعى پايدا بولادى. 

«تولە بي - دوستىق - اباي - ەسەنتاي وزەنى ايماعىندا جاياۋ جۇرگىنشى كەڭىستىگىن قۇرۋ جوسپاردا بار. بۇل 18 شاقىرىم اۋماقتى قامتۋى مۇمكىن. ءبىز ونى كىشى جاياۋ جۇرگىنشى اينالماسى دەپ اتايمىز. بۇل جەر دەمالىس اللەياسى رەتىندە قاراستىرىلىپ، ادامدار سەرۋەندەي الادى. تاريحي قالانىڭ جاياۋ جۇرگىنشىلەر ءۇشىن ىڭعايلى بولعانىن قالايمىز . اينالما اۋماعى باتىس، سولتۇستىك، شىعىس، وڭتۇستىك باعىتتاردى قامتيدى. كەلۋشىلەر كولىگىن قويىپ، جاياۋ جۇرگىنشى اۋماعىنا كەز-كەلگەن جاقتان كوتەرىلە الادى. الماتىنى جوسپارلاۋ جوباسى اۆتوكولىكتەرگە زيان تيگىزبەستەن جاياۋ جۇرگىنشى ايماعىن دامىتۋعا باعىتتالعان. اۆتورتۇراقتارعا بايلانىستى تۋىنداعان ۇساق ماسەلەلەردى شەشەمىز»،-دەيدى الماتى قالاسى ساۋلەت جانە قالا قۇرىلىسى باسقارماسى باستىعىنىڭ ورىنباسارى الماسحان احمەدجانوۆ

تولە بي كوشەسىندە كىشى جاياۋ جۇرگىنشى اينالماسىنىڭ قۇرىلىسى 2019 جىلى باستالادى. ازىرگە LRT ينجەنەرلىك جۇمىستارى جاسالادى. 

«جەڭىل رەلستى ترانسپورت جەلىسىنىڭ ينجەنەرلىك جۇمىستارى باستالادى. تولە بي كوشەسىنىڭ بويىمەن لرت وتەتىندىكتەن، قوعامدىق كولىككە بايلانىستى قۇرىلىس جۇرگىزىلەدى. كەلەسى جىلى جاياۋ جۇرگىنشى كەڭىستىگىن قۇرۋمەن اينالىسامىز»،-دەدى الماسحان احمەدجانوۆ. 
ەسكە سالا كەتسەك «ادامدارعا ىڭعايلى قالا » جوباسى اياسىنا 2020 جىلعا دەيىن الماتىدا 15 كوشە مەن 2 وزەن جاعالاۋى جاڭا كەلبەتكە يە بولاتىنىن جازعان بولاتىنبىز.