بۇگىن الماتىداعى قوعامدىق كەڭەس الاڭىندا قوعامدىق قاۋىپسىزدىكتى قامتاماسىز ەتۋ بويىنشا تىڭدالىم ءوتتى. وعان قالا بەلسەندىلەرى، ۇكىمەتتىك ەمەس ۇيىمدار مەن قالا تۇرعىندارى قاتىستى.

قوعامدىق كەڭەس مۇشەلەرى قالالىق ىشكى ىستەر دەپارتامەنتى جۇمىسىن جەتىلدىرۋ بويىنشا ازاماتتاردان تۇسكەن ءبىرقاتار ناقتى شارالار مەن ۇسىنىستاردى جاريالادى.

«جۇرتشىلىق تاراپىنان ءارتۇرلى باعىتتاعى كوپتەگەن ۇسىنىستار كەلىپ ءتۇستى. مىسالى، 102 كولل-ورتالىعىنىڭ جۇمىسىن جاقسارتۋ قاجەت. وسى ورتالىقتىڭ شتاتىن ۇلعايتۋ كەرەك، سەبەبى ادامدار كوبىنە حابارلاسا الماي جاتادى. بۇدان بولەك، قالا تۇرعىندارى پروباسيا جۇيەسىندە راقىمشىلىق جاسالعان سوتتالۋشىلاردى ساۋىقتىرۋ جانە بەيىمدەلۋ جاعدايىنا الاڭداۋشىلىق بىلدىرۋدە. قالالىق ءىىد جانە اۋداندىق ءاىىب باسشىلارى ءۇشىن KPI ەنگىزۋ قاجەتتىگى بەلسەندى تۇردە تالقىلاندى. سونداي-اق، جالاقى تولەۋ، بىلىكتى كادرلار ىرىكتەۋ ماسەلەلەرى كوتەرىلدى»، - دەپ ءبولىستى ۇسىنىستارمەن قوعامدىق كەڭەس ءتوراعاسى راحمان الشانوۆ.

ءوز كەزەگىندە، قوعامدىق كەڭەس مۇشەسى مارات شيبۇتوۆ قالا تۇرعىندارى مەن پوليسيانىڭ  ۇساق قۇقىق بۇزۋشىلىقتارعا توزىمسىزدىگى ماسەلەسىن كوتەردى.

«قالا تۇرعىندارى الەۋمەتتىك جەلىدە ۇساق قۇقىق بۇزۋشىلىقتاردىڭ اشىلماي قالا بەرەتىنىن اتاپ ءوتتى. وسىعان بايلانىستى ادامداردىڭ پوليسياعا دەگەن سەنىمى جوعالىپ بارادى. ەگەر پوليسيا ۇرلانعان كارىز قاقپاعى نەمەسە تەلەفوندى تابا الماسا، ءىرى توناۋشىلىق نەمەسە قاراقشىلىق قىلمىستى اشا الار ما ەكەن؟ سوندىقتان، پوليسيا وسىعان ءمان بەرگەنى ءجون»، - دەدى شيبۋتوۆ.

تىڭدالىم قورىتىندىسى بويىنشا، قوعامدىق كەڭەس بارلىق ايتىلعان ۇسىنىستاردى ۇكىمەت پەن پارلامەنتكە زاڭ تارتىبىمەن جىبەرەدى.