الماتى ءتارتىپ ساقشىلارى زاڭسىز ساۋدا نۇكتەلەرىن انىقتاۋ ءۇشىن قالاداعى ءىرى اۆتوبازارلارىنا رەيدكە شىقتى.

بۇگىن تاڭەرتەڭ «جىبەك جولى» اۆتوبازارىنا ءتارتىپ ساقشىلارى رەيد جاسادى. بازاردى پوليسەيلەر مەن ۇلتتىق گۆارديانىڭ اسكەري قىزمەتشىلەرى قورشاۋعا الىپ، ونىڭ اۋماعىنا ەشقانداي كولىكتى كىرگىزبەدى. اسكەريلەر بازار اۋماعىنان شىققىسى كەلگەن ءار كولىكتى ەگجەي-تەگجەيلى تەكسەرىپ شىقتى. سونداي-اق، مۇنداي رەيد قالاداعى ەكى بازاردا ءبىرۋاقىتتا جۇرگىزىلدى. رەيدكە 2 مىڭ ادام جۇمىلدىرىلدى.

«25 شىلدەدە قالاداعى قىلمىستىق جاعدايلاردىڭ قالپىنا كەلتىرۋ ءۇشىن  الماتىدا جەدەل پروفيلاكتيكالىق  شارالار ءوتتى. بازارداعى ساۋداگەر دە ساتىپ الۋشى دا تەكسەرۋدەن وتكىزىلدى. باسقا مەملەكەتتەن كەلگەندەردىڭ جەكە باسىنا قاتىستى تەكسەرۋ جۇمىستارىن جۇرگىزدىك. كوشى-قون تۋرالى زاڭنامانى بۇزعان تۇلعالارعا قاتىستى اكىمشىلىك جازا قولدانىلادى. ولاردىڭ باسقا قىلمىستارعا قاتىستىلىعى تەكسەرىلىپ جاتىر. جالپى جۇمىس 29 شىلدەگە دەيىن جالعاساتىن بولدى»، - دەدى قالالىق ءىىد رەسمي وكىلى سالتانات ازىربەك.

سونىمەن قاتار، اۆتوبولشەكتەر ساتاتىن ساتۋشىلاردىڭ ساۋدا جۇرگىزۋگە ليسەنزياسى تەكسەرىلىپ جاتىر.  ساۋداگەرلەر ۇرلانعان زاتتاردى ساتپايتىندارىن ايتتى. ولاردىڭ ايتۋىنشا اۆوبولشەكتەردى ءدال وسى كۇيىندە قويمادان الدىرادى ەكەن.

«Nissan-نىڭ ەكى ايناسى بار. مەن ولاردى قويمادان الدىردىم. ۇرلانعان اينالاردى ۇسىناتىندار بار، ءوز باسىم المايمىن»،-دەدى بازار ساۋداگەرى.

بازار باسشىسى اعزام يبراگيموۆتىڭ سوزىنە قاراعاندا، ساۋداگەرلەر ۇرلانعان زاتتاردى ساتقان كۇندە ولارمەن اراداعى كەلىسىم شارت بۇزىلادى.

 «ۇرلانعان بولشەكتەردى ساتىپ الۋشىلاردى ۇستاعان جاعدايدا، ولارمەن كەلىسىمشارتتى بۇزامىز. وتكەن جىلدان باستاپ وسىنداي ەرەجە ساقتالعان. اينالامىز تولعان ۇرلىق-قارلىق. مەنىڭ دە اينامدى بىرەۋلەر ۇرلاپ كەتكەن»،-دەدى اعزام يبراگيموۆ.

الماتى پوليسياسى رەيد جۇمىستارىن 29 شىلدەدە قورىتىندىلاماق. الايدا، ءقازىردىڭ وزىندە ارالىق قورىتىندى ناتيجەلەرى بار.

ساتۋشىلاردىڭ كوپشلىگىندە تاۋاردىڭ زاڭدىلىعىن راستايتىن قۇجات جوق. ولار مۇنى ساۋدا نۇكتەسىنىڭ قوجايىنىنىڭ جوقتىعىمەن تۇسىندىرەدى.

سونداي-اق، رەيد بارىسىندا كامەلەتكە تولماعان بالالار جۇمىس جاسايتىن ءبىرقاتار ساۋدا ورنى انىقتالدى.

ەندى ولاردىڭ  اتا-انالارىنا قاتىستى اكىمشىلىك حاتتاما تولتىرىلاتىن بولادى.

رەيد كەزىندە جۋرناليستەردىڭ كوزىنشە كولىگىنە ەسىرتكى جاسىرعان ەر ادام ۇستالدى. بەلگىلى بولعانداي، ول پوليسيانىڭ كۇدىگىن تۋعىزعان.