بۇگىن ماقتاارال اۋدانى اكىمىنىڭ اپپاراتىندا اۋداندىق دەربەس ءبولىم باسشىلارى جانە 2 كەنت، اۋىلدىق وكرۋگ اكىمدەرىنىڭ قاتىسۋىمەن كەڭەيتىلگەن اپپارات ءماجىلىسى ءوتتى. اۋدان اكىمى باقىت اسانوۆتىڭ توراعالىعىمەن وتكەن جيىندا حاتتامالىق تاپسىرمالاردىڭ ورىندالۋ بارىسى تالقىلاندى.

جيىندا بايانداما جاساعان اۋدان اكىمىنىڭ ورىنباسارى ب.تورەبەكوۆ ەڭ الدىمەن ورىندالعان تاپسىرمالاردى اتاپ ءوتتى. حاتتامالىق تاپسىرمالارعا سايكەس، «ماقتاارال اكىمى اپپاراتى» مەملەكەتتىك مەكەمەسىنىڭ ەرەجەسى ازىرلەنىپ، بەكىتىلگەن. سونداي-اق، اۋدان اۋماعىن ءبولۋ جولىمەن «ماقتاارال» جانە «جەتىساي» اۋداندارىنىڭ قۇرىلۋىنا وراي مەملەكەتتىك قىزمەتكەرلەرگە حابارلاما جوباسى ازىرلەنىپ، تانىستىرىلعان. اۋدان اكىمى اپپاراتىنىڭ، دەربەس بولىمدەر جانە 2 كەنت، اۋىلدىق وكرۋگ اكىمدىكتەرىنىڭ شتاتتىق قۇرىلىمى اۋدان اكىمىنىڭ قاۋلىسىمەن قايتا بەكىتىلگەن. سونىمەن قاتار، مەملەكەتتىك قىزمەتكەرلەردىڭ بىلىكتىلىك تالاپتارى مەن لاۋازىمدىق نۇسقاۋلىقتارى ازىرلەنگەن.

ب.تورەبەكوۆ اۋدان اكىمى اپپاراتىنىڭ عيماراتىن جوندەۋدەن وتكىزۋ ءۇشىن اقاۋ اكتىسى مەن سمەتالىق ەسەپتەمەلەرى جاسالعاندىعىن دا اتاپ ءوتتى. سونداي-اق، تاپسىرمادا كورسەتىلگەندەي اۋدان اكىمدىگىنىڭ جۇمىسپەن قامتۋ جانە الەۋمەتتىك باعدارلامالار ءبولىمىنىڭ مىرزاكەنت كەنتىندە ورنالاسقان عيماراتى اكتەلىپ، سىرلانىپ، قاسبەتى مەن اۋماقتارى رەتكە كەلتىرىلگەن.

اۋدان اكىمىنىڭ ورىنباسارى ب.تورەبەكوۆ مەرزىمىنەن كەشىككەن تاپسىرمالاردىڭ ورىندالۋ بارىسى تۋرالى دا باياندادى. ءوز كەزەگىندە اۋدان اكىمى ب.اسانوۆ جاۋاپسىزدىق تانىتىپ، جۇمىسىنا نەمقۇرايلى قاراعان باسشىلارعا ەسكەرتۋ جاساپ، بەرىلگەن تاپسىرلامالاردى ۋاقىتىلى ءارى ساپالى ورىنداپ وتىرۋ كەرەكتىگىن ايتتى.

«مەن تاعى قايتالاپ ايتامىن. ەگەر، جۇمىستى ۇيىمداستىرا بىلمەسەڭىزدەر، بەرىلگەن تاپسىرمالاردى ۋاقىتىلى ورىنداي الماساڭىزدار ورىندارىڭىزدى بوساتىڭىزدار. قانشاما حالىق بىزگە قاراپ وتىر. ءبىز ولاردىڭ تالاپ-تىلەگىن ورىنداپ، اۋداندى كوركەيتىپ، بارىنشا دامىتۋىمىز كەرەك» - دەدى باقىت ءناسىرحان ۇلى.     

جيىن بارىسىندا اۋداندىق تۇرعىن ۇي-كوممۋنالدىق شارۋاشىلىق، جولاۋشىلار كولىگى جانە اۆتوموبيل جولدارى ءبولىمىنىڭ باس مامانى ب.مامبەتوۆ وتكەن اپتادا ۇيىمداستىرىلعان سەنبىلىكتىڭ ناتيجەسى تۋرالى بايانداما جاسادى. سونداي-اق، اۋدان اۋماعىندا جۇرگىزىلىپ جاتقان قۇرىلىس نىساندارىنىڭ احۋالى تۋرالى اۋداندىق ساۋلەت، قالا قۇرىلىسى جانە قۇرىلىس ءبولىمىنىڭ باس مامانى ب.اناربەكوۆ ەسەپ بەردى. ال، ءسوز كەزەگىن العان اۋدان اكىمى اپپاراتى جالپى ءبولىمنىڭ باسشىسى د.اسابايەۆ اۋدان اكىمىنىڭ تۇرعىنداردى جەكە قابىلداۋ شارالارىن ۇيىمداستىرۋ بارىسى جانە كىرىس-شىعىس قۇجاتتارىنىڭ اينالىمى تۋرالى  باياندادى.