تاراز قالاسىنداعى "اتلەتيك" سپورت كەشەنىندە ءمۇعالىم ناماز وقىپ جاتقان وقۋشىلاردى بالاعاتتاپ، بولمەدەن قۋىپ شىققان ەدى. بۇل ۆيدەو الەۋمەتتىك جەلىدە قىزۋ تالقىلانىپ جاتىر. ءوز كەزەگىندە جامبىل وبلىسى اكىمدىگىنىڭ دەنەشىنىقتىرۋ جانە سپورت باسقارماسىنىڭ باسشىسى بۇل وقيعاعا بايلانىستى جاۋاپتى ادامداردىڭ جازالاناتىنىن مالىمدەدى. اتالعان وقيعاعا بايلانىستى، Qamshy.kz اقپارات اگەنتتىگىنىڭ ءتىلشىسى قمدب باسپا ءسوز قىزمەتىنىڭ جەتەكشىسى اعابەك قوناربايۇلىنا حابارلاسقان بولاتىن. اعابەك قونارباي ۇلى، ءمۇعالىمنىڭ ارەكەتىن ادامگەرشىلىككە جات قىلىق دەپ سىنعا الدى. 

"ءبىزدىڭ حالقىمىز ناماز، جايناماز سىندى شاريعاتتىڭ اسىل قۇندىلىقتارىن قۇرمەتتەپ، قادىرلەگەن. دىنىمىزدە ناماز وقىعان ادامعا كەدەرگى كەلتىرۋ بىلاي تۇرسىن، ونىڭ الدىنان كەسىپ وتۋگە استە بولمايدى. ال اقپارات قۇرالدارىندا تاراپ كەتكەن بەينەجازبادا ەر ازامات نامازعا جىعىلعان جاس بالانى بالاعاتتاعانىمەن قويماي، جاينامازىن جۇلىپ، جەلكەسىنەن يتەرىپ جىبەرىپتى. بۇل – ادامگەرشىلىككە جات قىلىق. ونىڭ ورەسكەل ارەكەتىن قاتاڭ ايىپتايمىز. ءدىني توزىمسىزدىك قۇلشىلىققا قۇرمەتسىزدىك پەيىلدەن باستالادى"، - دەيدى اعابەك قونارباي ۇلى.