اباي اۋدانىنىڭ ورتالىعى – قاراۋىلدا ويشىل، عۇلاما، اقىن شاكارىم قۇدايبەردى ۇلىنىڭ 160 جىلدىق مەرەيتويى اتالىپ ءوتتى. مەرەكە اياسىندا شاكارىمنىڭ ۇلى ۇستازى ابايعا ەسكەرتكىش قويىلىپ، جاڭا سپورتتىق نىسان اشىلدى. تويدا اتا سالتقا سايكەس اس بەرىلىپ، ءتۇرلى ۇلتتىق ويىنداردان جارىس ۇيىمداستىرىلدى.

-بۇگىن شاكارىمنىڭ 160 جىلدىق ۇلى تويىندا ابايعا ەسكەرتكىش قويىلۋى - ءبارىمىز ءۇشىن ورتاق قۋانىش، بابامىزعا كورسەتىلگەن قۇرمەت، ءارى تاريحي وقيعا، - دەپ اشىلۋ سالتاناتىندا ءسوز العان وبلىس اكىمى دانيال احمەتوۆ ەسكەرتكىشتىڭ ماڭىزدىلىعىن اتاپ ءوتتى.

قولادان قۇيىلعان ەسكەرتكىشتىڭ اۆتورى – جاس ءمۇسىنشى، ابايلىق نۇربول قالييەۆ. ەسكەرتكىشتىڭ اشىلۋ سالتاناتىنا اباي قۇنانباي ۇلىنىڭ ۇرپاعى ماناتاي بالتاقاي ۇلى ارنايى شىقىرىلعانىن ايتا كەتۋ كەرەك. سونىمەن قاتار، سالتاناتتى ءىس-شاراعا شىعىس قازاقستان وبلىسىنىڭ اكىمى دانيال احمەتوۆ، استاناداعى ل.گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ، قوعام قايراتكەرى حافيز ماتايەۆ، جازۋشى مەدەۋ سارسەكە، تالعات كەڭەسبايەۆ، ءانشى كەنجەعالي مىرجىقباي، ءداستۇرلى ءانشى گۇلميرا سارينا باستاعان قۇرمەتتى قوناقتار قاتىستى.

بۇدان كەيىن جينالعان قاۋىم شاكارىم ەسكەرتكىشىنە ارنايى بارىپ تاعزىم ەتتى.  تويعا كەلگەن قۇرمەتتى قوناقتار شاكارىم بابا ەسكەرتكىشىنە گۇل شوقتارىن قويدى. ال اۋداندىق كىتاپحانا قورى  "رۋحاني جاڭعىرۋ" باعدارلاماسى اياسىندا "اباي الەمى" سەرياسىمەن جارىق كورگەن اباي، شاكارىم، مۇحتار شىعارمالارى جانە امىرە قاشاۋبايەۆ تۋرالى عۇمىرنامالىق ەڭبەكتەرمەن تولىقتى. بۇل قۇندى سىي ايماق باسشىسىنىڭ تارتۋى. مەرەكە اياسىندا زامان تالابىنا ساي سالىنعان جابىق باسسەيننىڭ اشىلۋ سالتاناتى دا بولدى. باسسەين كۇنىنە 40 ادامعا قىزمەت كورسەتە الادى. بەس جولاقتى باسسەيننىڭ ۇزىندىعى - 25، ەنى – 8،5 مەتر.

كەمەڭگەر شاكارىم بابامىزدىڭ 160 جىلدىق مەرەيتويى قاراۋىل توبەدە، كيىز ۇيلەر قالاشىعىندا جالعاستى. شاكارىم قۇدايبەردى ۇلىنىڭ رۋحىنا باعىشتالىپ قۇران-قاتىم ءتۇسىرىلدى، الىس-جاقىننان كەلگەن مەيماندارعا اس بەرىلدى.

بۇدان سوڭ قاراۋىل توبەدەگى ءىس-شارالار ۇلتتىق سپورت ويىندارىنا ۇلاستى. جورعا جارىس، تاي جارىس، الامان بايگە ۇيىمداستىرىلدى، «تۇيە پالۋان» انىقتالدى. كەشكىسىن ورتالىق ستاديوندا «قالامقاس» حالىق ءان-بي ءانسامبلى مەرەكەلىك گالا-كونسەرت ۇسىندى.