وزبەكستاندا تەلەارنالارعا ەلدىڭ تۇڭعىش پرەزيدەنتى يسلام كارىموۆتىڭ ەسىمىن اتاماۋ جونىندە بۇيرىق كەلىپتى. اتالمىش بۇيرىق ۇلتتىق تەلەراديوكومپانيا قۇرامىنداعى بارلىق تەلەارنالارعا قاتىستى. بۇل تۋرالى جەرگىلىكتى ارنالاردىڭ بىرىندە جۇمىس ىستەيتىن جۋرناليست حابارلاعان ەكەن، دەپ جازادى Qamshy.kz اقپارات اگەنتتىگى ازاتتىق راديوسىنا سىلتەمە جاساپ.

جۇرگىزۋشىنىڭ سوزىنە سەنسەك، ەندىگى ەفيردەن تارالاتىن بارلىق باعدارلامادا وزبەكستاننىڭ تۇڭعىش پرەزيدەنتى يسلام كارىموۆتىڭ ەسىمى اتالماۋى ءتيىس. ءارى مۇنداي بۇيرىقتى پرەزيدەنتتىڭ مەملەكەتتىك كەڭەسشىسى حايريددين سۇلتانوۆ بەرىپتى.

«كارىموۆتىڭ ەسىمى ەفيردە اتالسا، باستارىڭمەن جاۋاپ بەرەسىڭدەر»، - دەپ ءدوپ باسىپ ايتىپتى سۇلتانوۆ.

مۇنداي بۇيرىقتىڭ شىن مانىسىندە بولعانىن وزبەكستاندىق تەلەارنالاردىڭ ءبىرىنىڭ باس رەداكتورى دا راستاعان. ايتۋىنشا، جىل باسىنان بەرى يسلام كارىموۆ جايلى ازىراق ايتىپ، شاۆكات ميرزيەيەۆ جايلى كوبىرەك ايتۋعا كەڭەس بەرىلگەن. ءتىپتى ەفيردە يسلام كارىموۆتىڭ سۋرەتتەرى مەن ەسكەرتكىشتەرىن كورسەتۋگە دە بولمايدى.

ايتا كەتەيىك، 2017 جىلى 31 تامىزدا وزبەكستاننىڭ تاۋەلسىزدىك كۇنىنە وراي ۇيىمداستىرىلعان شارادا قۇتتىقتاۋ ءسوز سويلەگەن ميرزيايەۆ كاريموۆتىڭ "تۋعان ەلى مەن مەملەكەت الدىندا سىڭىرگەن ۇلى قىزمەتىن" اتاپ ءوتىپ، ەلدىڭ ەسىندە ماڭگى ساقتالاتىنىن ايتقان.

ميرزيايەۆ ەستە قالدىرۋ شارالارىنىڭ ءارى قاراي دا جالعاسا بەرەتىنىن ايتقان. ءدال وسى كۇنى تاشكەنتتەگى "وكساروي" رەزيدەنسياسىنىڭ الدىندا كاريموۆكە ارنالعان ەسكەرتكىش اشىلدى.

سول جىلى قىركۇيەك ايىندا سامارقاند قالاسىندا كاريموۆكە ارنالعان تاعى ءبىر ەسكەرتكىش اشىلعان.

2018 جىلى 30 قاڭتاردا وزبەكستان يسلام كاريموۆتىڭ 80 جىلدىعىن اتاپ ءوتتى. بۇل كۇنى ەلدىڭ كارشي قالاسىندا يسلام كاريموۆكە ارنالعان ەسكەرتكىشتىڭ سالتاناتتى اشىلۋى بولدى. ال سامارقاندتا ءبىرىنشى پرەزيدەنتكە ارنالعان مەموريالدى كەشەننىڭ قۇرىلىسى اياقتالدى.