جۇمىس ساپارى كەزىندە قالانىڭ تاريحي ورتالىعىن ارالاعان مەاگپوليس اكىمى باۋىرجان بايبەك اباي كوشەسىندەگى 69 ۇيدە ورنالاسقان تۇركسىب اۋرۋحاناسىنىڭ بۇرىنعى عيماراتىن الماتىنىڭ ساۋلەت ەسكەرتكىشتەرى تىزىمىنە ەنگىزۋدى تاپسىردى. نىسان 1950 جىلدارى ارحيتەكتور ميحايل كۋدرياۆسيەۆتىڭ جوباسى بويىنشا سالىنعان. ونىڭ باستى كىرە بەرىسى مەن قاپتالدارى، جاقتاۋلارى ءتورت جاقتى كومپوزيسيالىق باعانالارعا تىرەلگەن. قاپتالداردىڭ اركالارى، ليۋنەتتەرى تاڭبالى بەلدەۋلەرمەن وڭدەلگەن. عيمارات «ۇلتتىق ستيلدە» سالىنعان كونەلەردىڭ ءبىرى بولىپ تابىلادى ءارى ونىڭ ساۋلەتىندە كلاسسيكالىق جانە وڭىرلىك سينتەز ءوزارا ۇشتاسقان، ياعني الماتى ماگيسترالى قۇرىلىسىنىڭ باستى ەلەمەنتى بولىپ تابىلادى. سىرتقى سولتۇستىك قاباتىندا ىشكى اۋلا جانە جاسىل جەلەككە ورانعان كەڭىستىك بار.

قازاقستان رەسپۋبليكاسىنىڭ «تاريحي-مادەني مۇرا وبەكتىلەرىن قورعاۋ جانە پايدالانۋ» زاڭىنىڭ نەگىزىندە وبەكتىنى تىزىمگە ەنگىزۋ وعان تاريحي جانە مادەني ەسكەرتكىش مارتەبەسىن بەرەدى. زاڭعا سايكەس ونى پايدالانۋشى ەسكەرتكىشتىڭ قورعالۋىن قامتاماسىز ەتۋى ءتيىس. ياعني، عيماراتىڭ سىرتقى كەلبەتىن، ءىشىن، كونسترۋكسيالارىن، ماقساتتى پايدالانىلۋىن، اۋماعىن وزگەرتۋگە تىيىم سالىنادى. جوندەۋگە، قايتا جاساۋعا بايلانىستى اتقارىلاتىن شارالاردىڭ بارلىعى وكىلەتتى ورگانمەن كەلىسۋ ارقىلى جۇزەگە اسادى.

ەسكە سالساق، بۇرىندارى الماتى اكىمى باۋىرجان بايبەك زاڭعا سايكەس قالانىڭ يپپودرومى مەن «سايران» اۆتوۆوكزالىن جەرگىلىكتى ماڭىزى بار تاريحي ەسكەرتكىشتەر تىزىمىنە ەنگىزۋدى تاپسىرعان ەدى. ارتىنان عيماراتتىڭ بۇرىنعى كەلبەتىن قايتارۋ جونىندە جۇمىس باستالىپ، زاڭسىز قۇرىلىستار الىنىپ تاستالدى.