«رۋحاني جاڭعىرۋ» باعدارلاماسى اياسىندا ق ر پرەزيدەنتى اكىمشىلىگى ءار ولكەنىڭ تاريحىن قامتيتىن «ولكەتانۋ» وقۋلىعىن دايىنداۋدى تاپسىردى. ق ر ءبىلىم جانە عىلىم مينيسترلىگىنىڭ ى.التىنسارين اتىنداعى ۇلتتىق اكادەمياسى 5-7 سىنىپتارعا ارنالعان «ولكەتانۋ» كۋرسىنىڭ وقۋ باعدارلاماسىن ازىرلەدى. جاڭارتىلعان وقۋ باعدارلاماسىنا سايكەس ءار ءوڭىردىڭ ءوز وقۋلىعى دايىندالدى. باتىس قازاقستان وبلىسىندا دا بۇل وقۋلىقتى قۇراستىرۋعا جوعارى وقۋ ورىندارىنىڭ عالىمدارى، تاريحشىلار، ولكەتانۋشىلار، تاجىريبەلى پەداگوگتەر، ادىسكەرلەر تارتىلىپ، ساراپتاۋ كوميسسياسى جۇمىس جاسادى.
– 5-7 سىنىپتارعا ارنالعان «ولكەتانۋ» وقۋلىعى وسكەلەڭ ۇرپاق تۋعان ولكە تاريحىن، مادەنيەتىن، تاريحي تۇلعالارىن، تاريحي-مادەني وشاقتارىن ءبىلىپ، كورىپ، ساناسىنا ءسىڭىرىپ ءوسسىن دەگەن ماقساتپەن جاساقتالدى. بىرنەشە رەت مەملەكەتتىك دەڭگەيدە ساراپتامادان وتكىزىلدى. ەسكەرتپەلەرىمەن قايتىپ تا كەلدى، قايتادان جۇمىستانىپ، كوميسسيا وتىرىسىندا تالقىعا ءتۇسىپ، ەندى باسپاعا جىبەرىلگەلى تۇر. كەز-كەلگەن دۇنيەنى جاڭارتىپ، جاڭعىرتىپ وتىرۋ زامان تالابى. ءبىراق تاريحي فاكتىلەر، تاريحي-مادەني ەسكەرتكىشتەرىمىز وزگەرمەيدى. ال عىلىمي ىزدەنىستەر ارقىلى قوسىمشا اقپارات پايدا بولسا، ونى قوسۋعا دايىنبىز. سوندىقتان بۇل وقۋلىق تا قاتىپ قالعان دۇنيە ەمەس، ءالى تالاي تولىقتىرىلادى، - دەدى وبلىس اكىمىنىڭ ورىنباسارى عابيدوللا وسپانقۇلوۆ.
وبلىستىق ءبىلىم باسقارماسى باسشىسىنىڭ ورىنباسارى زاۋرە عۇماروۆانىڭ ايتۋىنشا، وقۋلىق 34 مىڭنان استام دانامەن «ارمان-پۆ» باسپاسىنان باسىلىپ شىعادى. ءتورت ءپان - قازاق ءتىلى مەن ادەبيەتى، گەوگرافيا، مۋزىكا، قازاقستان تاريحى پاندەرىنە كىرىكتىرىلىپ وقىتىلادى. وقۋ جۇكتەمەسىنىڭ كولەمى – 20 ساعات دەپ بەلگىلەنىپ وتىر.
– شاعىن كىتاپقا باتىس ايماقتىڭ مەكتەپتە وقىلىپ جۇرگەن تاريحىنا ەنبەگەن، ەنسە دە از بەرىلگەن مالىمەتتەردى تولىقتىرىپ، بالانى ويلاندىراتىنداي ماتەريالداردى جيناپ، باسىن بىرىكتىرىپ شىعارۋ - ۇلكەن جۇمىس. سول قىرۋار جۇمىستىڭ كۋاسى بولدىم. سىن دا ايتىلدى، پىكىرتالاس تا بولدى. 202 بەتتىك كىتاپقا بۇكىل باتىس قازاقستان وبلىسىنىڭ وڭىرلىك تاريحىن سىيعىزۋ، ونى 6-7 سىنىپتىڭ بالاسىنا تۇسىنىكتى قىلىپ قالاي بەرەمىز دەگەن وي تولعاندىردى. قادىر اقىن «بۇرىنعىنىڭ بالالارى اتا-اناسىنا تارتىپ تۋاتىن ەدى، قازىرگىنىڭ بالاسى زامانىنا تارتىپ تۋادى» دەيدى عوي. سول زامانىنا تارتىپ تۋعان بالاعا زاماننىڭ زىمىران اعىسىنان وزاتىن وي سالاتىن وقۋلىق جازۋىمىز كەرەك بولدى. مىنە، وسى باعىتتاعى جۇمىس باستالدى. ءبىلىم سالاسىنداعى تالاي وزگەرىس، جاڭالىق ەلگە جەتىپ جاتىر عوي. سونىڭ ىشىندە بالانى ۇلتجاندىلىققا، ەلجاندىلىققا، ءوزىنىڭ تۋعان ولكەسىنە قىزىعۋشىلىققا جەتەلەيتىن ءساتتى باستاما وسى وقۋلىقتى جازۋ دەپ ەسەپتەيمىن. كىتاپ بالالاردىڭ قاجەتىنە جاراسىن، تاريحىن تانۋعا، ولكەنىڭ
ورنەكتەرىن ومىرگە سىڭىرۋگە سەپ بولسىن، - دەدى ايتىسكەر-اقىن، ءتىل جاناشىرى، وقۋلىقتىڭ ساراپتاۋ كەڭەسىنىڭ مۇشەسى شولپان قىدىرنيازوۆا.
ولكە تاريحىنىڭ ەڭ باستى دەرەكتەرىن قامتىعان وقۋلىق 2018-2019 وقۋ جىلىندا شاكىرت قولىنا تيەدى.
