استانا اكىمدىگىن تولاسسىز جاۋعان جاۋىن ەسەڭگىرەتتى مە بەلگىسىز، سۋ باسقان قالادا قايىقپەن جۇزگەن قالا تۇرعىندارىن جازالادى دەپ جازادى Qamshy.kz اقپارات اگەنتتىگى. ەسكە سالساق، وسىدان بىرنەشە كۇن بۇرىن تولاسسىز جاۋعان جاۋىننىڭ كەسىرىنەن ەلوردالىقتار تىزەدەن سۋ كەشىپ جۇرۋگە ءماجبۇر بولدى. ءتىپتى كوشەدە ۇرلەمەلى قايىقپەن قالانىڭ قاق ورتاسىندا ءجۇزىپ جۇرگەندەر دە قىزۋ تالقىلاندى.
ال بيلىكتەگىلەر ادەتتەگىدەي ءبىر-بىرىن كىنالاپ الەك بولدى. پارلامەنت سپيكەرى قاسىم جومارت توقايەۆ پەن پرەمەر-مينيستر باقىتجان ساعىنتايەۆ اكىمدىككە كىنا ارتىپ جاتتى. ءوز كەزەگىندە استانا اكىمدىگى تۇرعىنداردان كەشىرىم سۇراپ، جاڭبىر كاناليزاسياسى پروبلەماسىن 2019 جىلى شەشۋگە ۋادە بەردى.
قالا تۇرعىندارىنان كەشىرىم سۇراپ قانا قۇتىلعان اكىمدىك قالا ورتاسىندا ۇرلەمەلى قايىقپەن جۇرگەن ەكى ازاماتتى جازالادى. جەرگىلىكتى پوليسيا قىزمەتكەرلەرىنىڭ ايتۋى بويىنشا، ەكى ازاماتتىڭ بۇل ارەكەتى ۇساق بۇزىقشىلىقتىڭ قاتارىنا كىرەدى-مىس. استانا قالاسىنىڭ مامانداندىرىلعان اۋدانارالىق سوتى "قايىقشىلاردىڭ" ءارقايسىسىنا 5 اەك كولەمىندە (12 025 تەڭگە) ايىپپۇل سالدى. كەيىن اكىمدىكتەگىلەر اۆتوبۋس جۇرگىزۋشىلەرىن جازالادى.
قالانىڭ قاق ورتاسىن سۋ باسىپ جاتقان كەزدە تىزەدەن سۋ كەشكىسى كەلمەي، ۇرلەمەلى قايىقپەن جۇرگەن ازاماتتاردىڭ ارەكەتى قىلمىس، بۇزاقىلىق بولسا اكىمدىكتىڭ سالعىرتتىعىن قالاي باعالاساق بولادى؟ سالىستىرمالى تۇردە قارايتىن بولساق بۇل جاعدايدا اكىمدىكتەگىلەردىڭ بارلىعى بىرنەشە جىلعا باس بوستاندىعىنان ايىرىلۋ كەرەك ەمەس پە؟! الدە بارلىعىنا كىنالى قالا ورتاسىندا قايىقپەن جۇزگەن ەكى ەر ازامات پەن اۆتوبۋس جۇرگىزۋشىلەرى بولعانى ما؟ نە سەبەپتى قالا تۇرعىندارىنا جازا قولدانۋ كەرەك ال اكىمدىكتەگىلەر كەشىرىم سۇراپ قانا قۇتىلادى؟ استانانىڭ تۋعان كۇنىنە 19 ملرد تەڭگەنى جۇمساعان بيلىك باس قالانىڭ كاناليزاسيا پروبلەماسىن شەشۋگە اقشاسىن اياپ قالدى؟ سۇراقتار كوپ، جاۋاپ ادەتتەگىدەي جوق.
