قىركۇيەكتە الماتىدا 16 مىڭ ينتەللەكتۋالدى كامەرا ىسكە قوسىلادى. بەينەباقىلاۋدىڭ وسىنداي ءتيىمدى ءتاسىلىن پوليسەيلەر الدىمەن المالى اۋدانىندا سىناقتان وتكىزدى. پيلوتتى جوبا ناتيجەلى شىققان سوڭ،  ەندى بۇكىل قالانى قامتىماق.

جاقىندا الماتىداعى ءاربىر اۋداندىق ىشكى ىستەر باسقارمالارىنىڭ اۋماعىنداعى اۋلالارداعى ءتارتىپتى كەزەكشى پوليسەي مونيتور ارقىلى باقىلايدى. جۋىق ارادا ول ءۇشىن قوسىمشا كامەرالار ورناتىلسا، ءقازىر ىستەپ تۇرعاندارى  ينتەللەكتۋالدى جۇيەگە قوسىلادى. بۇل ءبىر مەزەتتە ساپالى كادردى ونلاين رەجيمدە الۋعا جانە كۇدىك تۋدىرعان سەزىكتىنىڭ ارەكەتىن پوليسيا بولىمىندەگى جەدەل باسقارۋ ورتالىعى ارقىلى باقىلاۋعا مۇمكىندىك بەرەدى.

اقىلدى جۇيەنىڭ مۇمكىندىگىن ءبىر جىل بۇرىن المالى اۋدانىنىڭ پوليسەيلەرى العاشقى بولىپ تۇسىنگەن. پيلوتتى جوباعا جەرگىلىكتى ىشكى ىستەر دەپارتامەنتىنىڭ 1500-گە جۋىق كامەراسى قوسىلىپتى. ايتا كەتەيىك، ولاردىڭ قاتارىندا بۇعان دەيىن دە ورناتىلعاندارى بار. مامانداردىڭ ايتۋىنشا، تەحنيكالىق كومەكشىنىڭ وبەكتيۆى قورعالعان ايماقتاعى جاڭادان پايدا بولعان وزگەرىستى بىردەن سەزەدى ەكەن.  

«ماسەلەن، ادامدار قاپشىعىن نەمەسە سومكەسىن ءبىر جەردە تاستاپ كەتسە، كامەرانىڭ نازارىن بىردەن وزىنە اۋدارادى. سودان كەيىن بىزگە ول تۋرالى بەلگى بەرىلەدى. ول دىبىستىق نەمەسە بەينە تۇرىندە دە بولۋى مۇمكىن. اۋلالارداعى جاعدايعا كەلسەك، وندا كامەرا ارقىلى بەلگىلەنبەگەن جەرگە قوقىس تاستاپ، كولىكتەرىن قالاعان جەرگە قويىپ، جولدى بوگەيتىندەردى كورۋگە بولادى»، – دەدى  الماتى قالاسى IIد تەحنيكالىق قىزمەت باسقارماسىنىڭ باسشىسى ولگا اگافونوۆا.

ال بىرنەشە اپتادان كەيىن سمارت جۇيە بارلىق اۋداندىق ىشكى ىستەر باسقارمالارىنداعى ءتارتىپ ساقشىلارىنىڭ جۇمىسىن جەڭىلدەتەدى. سول قالاداعى 16 مىڭ كامەرا ءتۇسىرىپ جاتقان بەينەكادرلار ءبىر مەزگىلدە ءبىر ەكرانعا سىيىپ كەتەدى. وسىلايشا، ۋچاسكەلىك ينسپەكتورلار دە پلانشەت ارقىلى اۋداندى تولىق باقىلاۋدا ۇستاي الادى.

«ءقازىر ىشكى ىستەر دەپارتامەنتى بىرنەشە جاڭا جوبالاردى قولعا الىپ جاتىر. ولار «ساراپتاما» جانە «جولاق» دەپ اتالادى. سوڭعىسى تەك اۆتوبۋستارعا ارنالعان سىزىقتارداعى جول ەرەجەلەرىن بۇزاتىن جەڭىل كولىكتەردى باقىلايدى. وعان قوسا، حالىق كوپ جينالاتىن ورىنداردا تاعى مىڭعا جۋىق كامەرا ورناتۋ كوزدەلىپ وتىر. ءقازىر شامامەن، ونداي جەرلەردە 500-دەي كامەرا كۇنى-تۇنى ىستەپ تۇر. الەۋمەتتىك ماڭىزى بار نىساندار: مەكتەپتەر مەن ەمحانالاردا دا كامەرالار بار»، – دەدى الماتى قالاسى ءىىد رەسمي وكىلى سالتانات ازىربەك.

ءقازىر الماتى تىرشىلىگى 118 مىڭنان اسا كامەرانىڭ نازارىندا. ونىڭ 93 پايىزىن جەرگىلىكتى حالىق ءوز قارجىسىنا ورناتقان. ول «ءقاۋىپسىز قالا»، «ءقاۋىپسىز اۋلا» سەكىلدى باعدارلامالار اياسىندا جۇزەگە اسىپ وتىر. ماسەلەن، الماتىدا وتكەن جىلى كامەرالار كومەگىمەن 2500-دەن اسا قىلمىس اشىلىپ، كوپتەگەن جول ەرەجەلەرىن بۇزۋ دەرەكتەرى تىركەلگەن.