اتىراۋداعى ورتالىق مۋزەيدە «رۋحاني جاڭعىرۋ» باعدارلاماسى اياسىندا «بوكەي ورداسىنىڭ سوڭعى حانى جاڭگىر حاننىڭ تاريحتاعى ورنى» دەگەن اتاۋمەن كورمە زالى اشىلدى.

وندا XIX عاسىرداعى وردا قازاقتارىنىڭ تۇرمىسى مەن سالت-داستۇرىنە قاتىستى جادىگەرلەر، اقشا ۇلگىلەرى، فوتوسۋرەتتەر مەن ءتۇرلى قۇندى قۇجاتتار قويىلعان. ءوز زامانىنىڭ بەلگىلى تۇلعاسى بولعان جاڭگىر حان بوكەيحان ۇلى تۋعان حالقىنىڭ تۇرمىسىن ەۋروپا مادەنيەتىنە يكەمدەۋگە بارىن سالدى. سول عاسىردىڭ وزىندە وردادا ءدارىحانالار مەن شاعىن شەبەرحانالار جۇمىس جاساعان. جانە جالپىعا ورتاق، ەكى تىلدە وقىتاتىن مەكتەپتەر بولدى. وسى وقۋ ورىندارىن ءتامامداعان قابىلەتتى جاستاردى حان ءوز قارجىسىنا سانكت-پەتەربۋرگ، ۋفا، قازان سەكىلدى رەسەيدىڭ باستى قالالارىنا جىبەرىپ، ءبىلىم الۋلارىنا جاعداي جاساعان. كەيىن ولاردىڭ اراسىنان كوپتەگەن بىلىكتى تۇلعالار شىققانى تاريحتان بەلگىلى.

"XII-XX عاسىرداعى ولكە تاريحى زالىنداعى ەكسپوزيسيالىق قۇرىلىمنىڭ جالپى ماقساتى سول كەزەڭنىڭ تاريحي وقيعالارىمەن، تاريحي تۇلعالارىمەن تانىستىرا وتىرىپ، جاستاردىڭ وسى تۋعان جەرگە قازاق حالقىنىڭ تاريحىنا دەگەن سۇيىسپەنشىلىگىن ارتتىرۋ"، - دەيدى مۋزەي قىزمەتكەرى اقتوتى ورىنباساروۆا.