اتىراۋدا «ە-پيك» جوباسى ەنگىزىلەدى. بۇل تۋرالى وڭىرلىك كوممۋنيكاسيالار قىزمەتىندە وتكەن باسپا ءسوز كونفەرەنسياسىندا قالالىق ءتۇرعىن-ۇي ينسپەكسياسى ءبولىمىنىڭ باسشىسى قايرات حابييەۆ ءمالىم ەتتى.

«اتالعان جوبا «سيفرلى قازاقستان» مەملەكەتتىك باعدارلاماسى اياسىندا جۇزەگە اسادى. ماقساتى - كوندومينيۋم وبەكتىسىن باسقارۋشى ورگاندار مەن قالا تۇرعىندارى اراسىنداعى داۋلاردى ازايتۋ، پيك قىزمەتىنە اۆتوماتتاندىرىلعان شەشىم ەنگىزۋ. ناتيجەسىندە، تۇرعىندار ءۇشىن قىزمەت كورسەتۋ ساپاسى جاقسارىپ، جۇمىستىڭ ايقىندىلىعى ارتپاق»، - دەيدى ق.حابييەۆ.

سونداي-اق، «ە-پيك» جوباسى شەڭبەرىندە اتىراۋلىقتار ارنايى پورتالدا جەكە كابينەت اشىپ، وتىنىشتەرىن قالدىرا الادى. سونىمەن قاتار، جەكە كابينەتتە پيك حابارلامالارىن وقۋعا مۇمكىندىك قاراستىرىلعان.

سپيكەردىڭ ايتۋىنشا، قالا تۇرعىندارى دەرەكتەرىن «ە-پيك» جوباسىنا atyrau.opencity.kz سايتى ارقىلى ەنگىزە وتىرىپ، ارىز-شاعىمدار، تاپسىرىستارىن جازا الادى.

ايتا كەتەلىك، بۇل جوبانىڭ ۇيالى قوسىمشاسى قازان ايىنان باستاپ ىسكە قوسىلادى دەپ كۇتىلۋدە.